Vill aðgerðir vegna aflandsskýrslunnar strax

31.01.2017 - 13:02
Mynd með færslu
 Mynd: RÚV
Óli Björn Kárason, formaður efnahags- og viðskiptanefndar Alþingis, segir að íslensk stjórnvöld þurfi strax að endurskoða tvísköttunarsamninga við Holland og Lúxemborg, í ljósi niðurstöðu skýrslu um aflandseignir Íslendinga. Stjórnvöld þurfi líka að skoða hvernig staðið var að framkvæmd fjárfestingarleiðar Seðlabankans.

Það var fyrst og fremst til að komast undan skattgreiðslum hér á landi sem Íslendingar stofnuðu aflandsfélög og fluttu þangað hundruð milljarða króna. Þetta er meginniðurstaða höfunda opinberrar skýrslu um eignir Íslendinga á aflandssvæðum, sem var fjallað ítarlega um í Kastljósi í gærkvöld.

Óli Björn Kárason, formaður efnahags- og viðskiptanefndar Alþingis, segir ljóst að skýrslan varpi aðeins mjög takmörkuðu ljósi á það vandamál sem við sé að glíma, heilsteyptari mynd þurfi að fást.

„Ég held að það sem þessi skýrsla kennir okkur er að gagnaöflun og gagnasöfnun um fjármagnsflutninga er ekki eins og hún ætti að vera hér hjá okkur.“

Óli Björn segir að eftirlitsstofnanir eins og ríkisskattstjóri þurfi að meta til hvaða aðgerða eigi að grípa.

„En það er líka ljóst, finnst mér, að við þurfum að endurskoða nú þegar tvísköttunarsamninga sem eru í gildi milli Íslands og Hollands og Lúxemborgar. Þeir samningar eru ekki eins og til var stofnað, það er alveg ljóst.“

Einnig vakni spurningar um framkvæmd fjárfestingarleiðar Seðlabankans.

„Þegar veittur var 20% afsláttur af íslensku krónunni, og meðal annars íslenskir aðilar með fjármagn erlendis nýttu sér fjárfestingarleiðina. Það eru margar spurningar sem vakna þar, og ég held að við þurfum að skoða þá framkvæmd, hvernig var staðið að verki þar.“

tryggvia's picture
Tryggvi Aðalbjörnsson
Fréttastofa RÚV
Síðast:
Þessi þáttur er í hlaðvarpi