Vilja að þingmennirnir segi tafarlaust af sér

29.11.2018 - 19:19
Mynd með færslu
 Mynd: Rúv
Landssamband Framsóknarkvenna fordæmir og harmar þau ummæli sem þingmenn Miðflokksins og Flokks fólksins létu falla um konur þann 20. nóvember síðastliðinn. Ummælin lýsi meðal annars niðrandi viðhorfum til stjórnmálakvenna og líti sambandið þau mjög alvarlegum augum. Sambandið telur að þingmennirnir eigi að segja tafarlaust af sér, enda hafi þeir brotið siðareglur.

Í yfirlýsingu frá sambandi segir að helstu baráttumál þess sé jafnrétti kynjanna og aukin þátttaka kvenna í stjórnmálum. Margt hafi áunnist en þó séum við ekki enn komin á leiðarenda.

„Það er sorglegt að upplifa að kjörnir fulltrúar á Alþingi sýni slíka kvenfyrirlitningu, sér í lagi þar sem nokkrir af þessum þingmönnum hafa opinberlega talað fyrir auknu jafnrétti kynjanna," segir í yfirlýsingunni. Ummæli umræddra þingmanna séu alvarlegt brot á siðareglum sem allir þingmenn undirgangist.

„Viðhorf sem þessi í lýðræðissamfélagi sem fagnar um þessar mundir 100 ára fullveldi sínu eru óásættanleg með öllu. Þingmenn líkt og aðrir þjóðfélagsþegnar, bera fulla ábyrgð á orðum sínum og gerðum og teljum við það sem nú hefur þegar komið fram í fjölmiðlum vera þess eðlis að fyrrnefndir þingmenn segi tafarlaust af sér."

Landssamband Framsóknarkvenna áréttar að konur úr öllum stjórnmálaflokkum hafi náð kjöri út á eigin verðleika. „Við hvetjum þær til áframhaldandi góðra starfa og hafa þar með bein áhrif á mótun samfélagsins."