Vilja að afurðir séu fullnýttar heima í héraði

Mynd með færslu
 Mynd: Jóhannes Jónsson - RUV.IS
Aðferðir til að fullnýta afurðir heima í héraði voru rauði þráðurinn á íbúafundi í Varmahlíð. Óskað var eftir hugmyndum íbúa á Norðurlandi vestra vegna vinnu við sóknaráætlun fyrir árin 2020-2024. Umhverfismál vega þyngra en áður í nýrri sóknaráætlun og meðal annars er mælst til þess að mötuneyti á svæðinu kaupi meira beint frá býli eða beint úr bát.

Íbúar fjölmenntu á fund í menningarhúsinu Miðgarði í Varmahlíð í síðustu viku og segir Unnur Valborg Hilmarsdóttir framkvæmdastjóri Samtaka sveitarfélaga á Norðurlandi vestra mikinn hug í fólki. Menningar- og menntamál, atvinnuþróun og nýsköpun hafi verið ofarlega á baugi. Rauði þráðurinn hafi hins vegar verið hvernig hægt væri að fullnýta afurðir heima í héraði. „Norðurland vestra er gríðarlega stórt landbúnaðar hérað og hér er mikil frumframleiðsla, bæði í landbúnaði og sjávarútvegi en okkur vantar kannski frekari leiðir til þess að fullvinna þessar afurði hér og þannig skilja eftir sem mestan virðisauka á svæðinu,“ segir Unnur.  

Aukin ásókn í vottað vinnslurými

Þá sé til dæmis átt við að nýta betur ull og annað sem til fellur af sauðfé. Hún segir umhverfismál mun stærri hluti af sóknaráætluninni en áður sem rími vel við áherslu á fullnýtingu afurða. Partur af því sé að mötuneyti skóla á svæðinu nýti betur afurðir úr héraði með því að kaupa í meiri mæli beint frá býli eða beint úr bát. Þá þurfi að auðvelda bændum að vinna kjöt heima. Á Skagaströnd sé vörusmiðja með vottað vinnslurými sem bændur geti nýtt sér. Það geri þeir í auknum mæli og þurfi því ekki að koma sér upp vottuðu vinnslurými heima með tilheyrandi kostnaði. 

Íbúar svæðisins lykilþáttur

Þetta var síðasti fundur fyrir gerð nýrrar sóknaráætlunar en unnið hefur verið að henni frá því í vor. Ráðgjafar samtakanna hjá KPMG og draga saman þær upplýsingar sem hafa komið fram á fundum og könnunum. Stefnt er að því að hún verði tilbúin í byrjun október og verður hún þá birt á vef samtakanna þar sem hægt er að gera athugasemdir. „Við lítum á það þannig að þeir sem eru helstu sérfræðingarnir í bæði stöðu svæðisins og tækifærum þess eru íbúar svo samráðið er lykilþáttur í þessari vinnu,“ segir hún.

Unnið að sviðsmyndagreiningu fyrir atvinnulífið

Þetta er önnur sóknaráætlunin sem samtökin gera, sú fyrri er síðan árið 2015. Unnur segir mikilvægt að sóknaráætlunin taki á þessum mikilvægu þáttum er varða landshlutann því úthlutun styrkja taki mið af henni. Til dæmis þurfi þau verkefni sem fái styrk úr uppbyggingarsjóði ásamt áhersluverkefnum að hafa vísan í sóknaráætlun. Á fundinum var einnig unnið að sviðsmyndagreiningu fyrir atvinnulífið á svæðinu. Þá er unnið lengra fram í tímann heldur en í sóknaráætluninni eða til ársins 2040. Í henni sé skoðað í hvaða mögulegar áttir atvinnulíf á Norðurlandi vestra geti þróast, bæði verstu mögulegu stöðu ásamt þeirri bestu. Greininguna sé svo hægt að nota sem viðmið næstu ár og hægt að „rétta kúrsinn ef við sjáum að við erum að fara í átt að verri útkomunni,“ segir Unnur. 

 

Úlla Árdal
Fréttastofa RÚV
Síðast:
Þessi þáttur er í hlaðvarpi