Athugið þessi frétt er meira en 2 ára gömul.

Útlendinga- og loftslagsmál ástæður úrsagnar Andrésar

27.11.2019 - 15:15
Mynd með færslu
Andrés Ingi Jónsson, þingmaður Vinstri grænna. Mynd: RÚV
Andrés Ingi Jónsson hefur sagt sig úr þingflokki Vinstri grænna og hyggst starfa sem óháður þingmaður út kjörtímabilið. Hann segir aðgerðaleysi í loftslagsmálum og útlendingamál meðal ástæðna fyrir úrsögninni.

„Eins og við var að búast hefur verið nokkur áskorun að takast á við samskipti og samstarf í þingflokknum eftir þann ágreining sem stjórnarsamstarfið skapaði. Þó tel ég að við höfum öll lagt okkur fram um að vinna sem best saman,“ skrifar Andrés í tilkynningu.

Þá segir hann að upp hafi safnast dæmi sem honum þyki til marks um það sem hann óttaðist í upphafi, „að Vinstri græn ættu sífellt erfiðar með að veita samstarfsflokkunum mótspyrnu og stjórnarsamstarfið færðist enn fjær því sem flokkurinn ætti að standa fyrir.

Vissulega höfum við náð árangri en oft hafa málamiðlanir fallið fjarri okkar hugsjónum, eins og birtist til að mynda í stjórnarfrumvarpi um útlendinga á liðnu vori. Aðkallandi aðgerðir til að sporna við hamfarahlýnun hafa ekki gengið jafn langt og ég tel nauðsynlegt og sjálfsagt í ríkisstjórn undir forystu grænnar hreyfingar,“ skrifar Andrés.

 „Síðastliðin tvö ár hef ég upplifað að samstarfið hefti mig í að vinna af fullum krafti fyrir þeim hugsjónum sem ég var kosinn fyrir. Nú er svo komið að ég tel fullreynt að ég geti sinnt þingstörfum eftir samvisku minni og sannfæringu við núverandi aðstæður,“ skrifar hann.

 

ingvarthor's picture
Ingvar Þór Björnsson
Fréttastofa RÚV