Úrskurðaður í fjögurra vikna síbrotagæslu

19.03.2020 - 19:33
Mynd með færslu
 Mynd: Samsett mynd - RÚV
Karlmaður um þrítugt, sem var handtekinn í nótt, grunaður um aðild að eldsvoðanum á skemmtistaðnum Pablo Discobar í nótt, hefur verið úrskurðaður í fjögurra vikna síbrotagæslu, eða til 16. apríl, að kröfu Lögreglunnar á höfuðborgarsvæðinu. Maðurinn er sá hinn sami og stal steypubíl í miðbæ Reykjavíkur í síðustu viku, og skapaði stórhættu þegar hann ók honum á móti umferð.

Í tilkynningu frá lögreglunni kemur fram að rannsókn málsins miði vel.

Sjá einnig: Maðurinn við Pablo Discobar stal líka steypubílnum

Steypubílnum, sem lögregla veitti eftirför í miðbæ Reykjavíkur á miðvikudaginn i síðustu viku, var stolið við Vitastíg. Maðurinn ók niður Laugaveg, eftir Bankastræti og austur Sæbraut og var síðan króaður af við Kassagerðina. Engin slys urðu á fólki.  Mikil mildi þótti að ekki fór verr og er maðurinn talinn hafa valdið almannahættu. Manninum var sleppt að lokinni yfirheyrslu.

Hann var svo handtekinn aftur í nótt, grunaður um aðild að eldsvoða í húsakynnum skemmtistaðarins Pablo Discobar og veitingastaðarins Burro við Veltusund. Mikið tjón varð í eldsvoðanum.

Eldurinn kviknaði um klukkan ellefu í gærkvöldi. Allt tiltækt slökkvilið var kallað út, enda er skemmtistaðurinn á þriðju hæð í stóru timburhúsi. Þónokkur eldur logaði í húsinu og mikinn reyk lagði frá því, og um tíma var óttast að eldurinn bærist í samliggjandi hús. Það gerðist þó ekki, slökkvistarf gekk vel og því lauk um klukkan fjögur í nótt.

johann's picture
Jóhann Bjarni Kolbeinsson
Fréttastofa RÚV
Síðast:
Þessi þáttur er í hlaðvarpi