Uggandi um framtíð Árnasafns

Mynd: Wikimedia Commons / Wikimedia Commons

Uggandi um framtíð Árnasafns

25.08.2016 - 08:16

Höfundar

Starfsmenn Árnasafns við Kaupmannahafnarháskóla, systurstofnunar Árnastofnunar í Reykjavík, eru uggandi um framtíð stofnunarinnar. Háskólinn leitar leiða til að spara og í sumar skilaði ráðgjafarfyrirtæki inn tillögum um niðurskurð á hugvísindasviði skólans. Þar er meðal annars lagt til að húsnæðinu á Amager þar sem Árnasafn er starfrækt verði lokað.

Gottskálk Jensson, dósent á Árnasafni í Kaupmannahöfn, lýsti áhyggjum af þessu á Morgunvaktinni á Rás 1 í morgun. „Við höfum enn ekki fengið neina staðfestingu á því eða neinar vísbendingar um hvert við eigum að flytja ef til þess kemur að rýma bygginguna sem við erum í núna eða yfirleitt um framtíð okkar stofnana og faga.“

Enn hefur engin ákvörðun verið tekin en stjórn skólans hafi tekið vel í tillögurnar, sagði Gottskálk. Gamlar byggingar sem hýstu hugvísindasvið voru rifnar og nýjar reistar í staðinn. „Það virðist vera eitt af vandamálunum að menn hafa reist sér hurðarás um öxl í þessum byggingum. Nú virðist þurfa að skera niður starfsemina til að hafa efni á byggingunum.

Gottskálk Jensson, dósent á Árnasafni í Kaupmannahöfn.