Athugið þessi frétt er meira en 1 ára gömul.

Tilraunir gerðar til að sverta mannorð Jóhannesar

13.11.2019 - 08:38
Mynd: Samsett mynd / RUV
Gerðar hafa verið tilraunir til að sverta mannorð Jóhannesar Stefánssonar, fyrrverandi verkefnastjóra Samherja í Namibíu. Þetta segir Kristinn Hrafnsson, ritstjóri WikiLeaks .

Kristinn segir Jóhannes þegar hafa orðið fyrir mannorðsárásum opinberlega. „Það er hins vegar nokkuð sem hefur undir kraumað og ég hef vitneskju um sem er svo ógeðfellt að manni verður eiginlega bumbult,“ sagði Kristinn í Morgunútvarpinu á Rás 2.  Kristinn svaraði því ekki hvað þetta væri en sagði að blaðamenn sem þekktu til, meðal annars hjá RÚV, myndu upplýsa um það þegar þeir væru tilbúnir til þess. Hann sagði að þarna væri um að ræða eitthvað sem hefði þegar verið reynt að dreifa um Jóhannes. „Í ófræingarherferð sem hefur borist frá þessum samstarfsaðilum Samherjaforystunnar í Namibíu og hér innanlands,“ sagði Kristinn. 

Í yfirlýsingu frá Samherja í gær er ábyrgðinni varpað á Jóhannes. Kristinn segir að fullyrðingar í yfirlýsingunni haldi ekki vatni. „Eins og fram kemur í gögnunum á WikiLeaks.org hafði hann bara afskaplega takmarkaða prókúru í þessu namibíuverkefni. Allar stórar fjármálatilfærslur fara í gegnum fjármálastjóra og yfirstjórn fyrirtækisins hér á Íslandi. Það er ekki hann sem er að millifæra af laumumreikningum Samherja yfir á laumureikning I Dubai. Hitt sem sýnir hvernig þetta andsvar heldur engan veginn vatni að þá voru greiðslur að berast allt fram á þetta ár. Tveimur og hálfu ári eftir að Jóhannes fer frá fyrirtækinu. Þannig að þetta heldur engu vatni og tilraunir til að blása upp einhverjum moðreyk um að Samherjaelítan sé einhverskonar fórnarlamb Jóhannesar í þessu máli nær ekki nokkurri átt og ætti í raun ekki að birtast athugasemdarlaust í neinum fjölmiðli,“ sagði Kristinn. 

Mynd með færslu
 Mynd: EPA

 

Kristinn segir Jóhannes hafa komið til sín fyrir rúmu ári síðan þegar hann var nýorðinn ritstjóri WikiLeaks. Strax þegar gögnin voru skoðuð hafi verið ljóst að um stórfrétt væri að ræða. Í kjölfarið er haft samband við Kveiksmenn og Inga Frey Vilhjálmsson á Stundinni hafi síðan bæst við og svo Al Jazeera og the Namibian. „Jóhannes var strax fullviss um að hann ætlaði að stíga fram og standa að baki þessum gögnum og vitna um þau,“ sagði Kristinn og bætti við því að Jóhannes hefði gengist við því að vera sjálfur sekur. „Hann er sjálfur að því og hefur ekki dregið fjöður yfir það. Hefur gert það alveg undanbragðalaust og mun svara fyrir sínar gjörðir,“ sagði Kristinn.

Kristinn segir að upplýsingar sem Kveikur, Stundin og WikiLeaks birtu í gær hafi verið fyrri hluti umfjöllunar um málið. Seinni hlutinn verði birtur eftir tvær til þrjár vikur í al Jazeera. Al Jazeera hafi komið seinna að vinnunni, eða fyrir um hálfu ári. Ekki sé óalgengt að rannsóknardeild Al Jazeera, sem staðsett er í Bretlandi, taki sér ár í sína rannsóknarvinnu. Kristinn segist hins vegar hafa tekið þá ákvörðun að ekki væri hægt að bíða með umfjöllunina.

 

Fréttin hefur verið uppfærð.