Í höfninni á Akranesi. Mynd: Anton Brink - Ruv.is
Athugið þessi frétt er meira en 7 ára gömul.
Tilraunasiglingar Akraborgar næsta sumar
Starfshópur um flóasiglingar leggur til að farið verði í tilraunasiglingar milli Reykjavíkur og Akraness næsta sumar. Farnar verði að minnsta kosti þrjár ferðir á dag frá heimahöfn. Skýrsla hópsins er væntanleg fyrir jól, segir formaður starfshópsins.
Reykjavíkurborg og Akranes skipuðu í starfshópinn í lok maí til að kanna forsendur fyrir rekstri nýrrar Akraborgar sem færi á milli Reykjavíkur og Akraness. Með skipan starfshópsins var fylgt eftir viljayfirlýsingu á milli Reykjavíkur og Akraness frá því í janúar um flóasiglingar. Faxaflóahafnir létu vinna frumskýrslu um málið sem borgarráð fól skrifstofu eigna- og atvinnuþróunar borgarinnar að yfirfara. Hlutverk starfshópsins var að skoða ábendingar hennar.
Siglingin tók innan við hálftíma
Regína Ásvaldsdóttir, bæjarstjóri á Akranesi, sagði frá prufusiglingu sem hún og borgarstjóri fóru ásamt starfshópnum í Morgunútvarpinu á Rás 2 í byrjun nóvember. Þar sagði hún frá því að hópurinn hefði farið með hvalaskoðunarbátnum Rósinni, sem er svipuð ferja og lagt er upp með að gæti farið slíkar farþegasiglingar, frá Akranesi til Reykjavíkur. Ferðalagið tók 28 mínútur, sem er styttri tími en gert hafði verið ráð fyrir.
Ekki er gert ráð fyrir að bílaferja, eins og gamla Akraborgin, verði notuð í siglingarnar, heldur ferja sem taki um 65 manns.
Akstur frá miðbæ Akraness í miðbæ Reykjavíkur tekur um 40 mínútur þegar greiðfært er og lítil umferð. Í frumskýrslunni kemur fram að það taki strætó hátt í klukkustund að aka milli Akraness og Mjóddar í Reykjavík. Þá eigi eftir að bætast við rúmar 20 mínútur til viðbótar í ferðatíma með strætó úr Mjódd og niður í miðbæ. Ljóst er að mikið hagræði yrði af ferjunni fyrir þá sem aka á degi hverjum milli sveitarfélaganna. Sá hópur er talinn vera á annað þúsund manns.
„Við leggjum til að farið verði í tilraunasiglingar næsta sumar á litlum farþegabáti. Á tilraunatímabilinu yrðu farnar að lágmarki þrjár ferðir á dag frá heimahöfn, sem sagt sex ferðir fram og til baka. Þetta þýðir að hægt yrði að nýta allan daginn á hvorum stað. Ferjan myndi leggja að við Faxagarð í Reykjavík, skammt frá Hörpu með góða tengingu við strætó og bílakjallara,“ segir Kristín Soffía Jónsdóttir, formaður starfshópsins. Akraneskaupstaður yrði í raun hluti af höfuðborgarsvæðinu. „Kanar mæla til dæmis ekki ferðalög í vegalengd heldur ferðatíma. Á endanum skiptir ferðatíminn mestu máli.“
Allar samgöngur með meðgjöf
Kristín Soffía segir að í skýrslunni sé lagt til að farið verði í útboð á siglingunum. Aðspurð um hvort ferjusiglingarnar fái styrki frá sveitarfélögunum segir hún að gert sé ráð fyrir að þörf sé á meðgjöf með rekstrinum. „Allar samgöngur eru með meðgjöf hér á landi, sama hvar ber niður,“ segir Kristín Soffía. „Til samanburðar má vekja athygli af því að sveitarfélög fá engar tekjur af olíugjaldi en Reykjavík ver fjórum milljörðum á ári í nýlagningu og viðhald vegakerfisins ári.“
Hún segir að ferjan gæti breytt miklu til dæmis fyrir nemendur á Akranesi sem sæki skóla í Reykjavík og næsta nágrenni og geti einnig stækkað svæðið sem kynnt er fyrir ferðamönnum. Þannig gæti Akranes farið að keppa við til dæmis Hveragerði um ferðamenn. Ferjan gæti líka aukið ferðalög innanlands, segir Kristín Soffía, og tekur sem dæmi að um 20 prósent heimila í miðborginni séu bíllaus. Þá geti ferjan boðið upp á spennandi dagsferðir fyrir hjólreiðamenn sem gætu hjólað Hvalfjörðinn en farið til baka með ferjunni.
Kristín Soffía segir að starfshópurinn hafi verið í samstarfi við ýmsa aðila og fengið fólk á sinn fund. Vinnu við skýrsluna sé lokið og aðeins eigi eftir að setja endapunktinn á hana. „Stefnt er að því að skila skýrslunni í næstu viku. Allavega fyrir jól.“
