Athugið þessi frétt er meira en 3 ára gömul.

Tæplega 800 ferðir í sjúkraflugi á síðasta ári

10.01.2020 - 14:50
Mynd með færslu
 Mynd: www.sak.is
Framkvæmdastjóri Mýflugs er hlynntur hugmyndum um sjúkraþyrlu á sunnanverðu landinu. Það myndi minnka verulega sjúkraflug félagsins til Vestmannaeyja. Hann segir að ríkið skuldi Mýflugi fjármuni aftur í tímann þegar mun meira var flogið en útboð sagði til um.

Eftir nær samfellda aukningu í sjúkraflugi síðustu ár dró örlítið úr því árið 2019. Mýflug fór í 770 sjúkraflugferðir á síðasta ári en 808 árið áður.

Segir hentugt að gera sjúkraflugið út frá Akureyri

Miðstöð flugsins er á Akureyri. Þar eru tvær flugvélar til taks og ríflega fimm áhafnir. „Það var niðurstaðan á sínum tíma, þegar þetta var skoðað, að besta staðsetningin fyrir sjúkraflugvél væri hér,“ segir Leifur Hallgrímsson, framkvæmdastjóri Mýflugs.  

Sammála hugmyndum um sjúkraþyrlu á Suðurlandi

Núverandi fyrirkomulag sjúkraflugs hefur þó verið gagnrýnt, meðal annars í Vestmannaeyjum og á Ísafirði. Sjúkraþyrla á Suðurlandi myndi bæta þar úr og Leifi líst vel á þær hugmyndir. „Ég reikna með því að það myndi fækka svona sirka um helming flugferðunum hjá okkur inn á Vestmannaeyjar við það að þyrla yrði staðsett á Suðvesturhorninu eða á Suðurlandi.“

Mýflug telur sig eiga inni fjármuni hjá ríkinu

Fluginu er sinnt samkvæmt útboði ár hvert þar sem greitt er fyrir ákveðinn fjölda ferða. Þar segir Leifur óuppgert við ríkið. „Þegar þetta var boðið út 2012 þá var gert ráð fyrir 470 flugum. Árið 2016, 2017 og 2018 urðu þau nærri 800.“ Þarna telji Mýflug sig eiga inni talsverða fjármuni hjá ríkinu, en um það sé ágreiningur. „Það þarf að klára þau mál með einhverjum hætti,“ segir hann.

Aukið álag vegna niðurskurðar hjá slökkviliðinu

Nærri fjórðungur af öllum útköllum Slökkviliðsins á Akureyri á síðasta ári var vegna sjúkraflugsins. Einn til tveir menn þaðan fara að jafnaði í hverja ferð. Fjölgað var um þrjú stöðugildi hjá slökkviliðinu árið 2017 til að bregðast við álagi vegna sjúkraflugsins. En það er að breytast. „Það liggur fyrir niðurskurður hjá bænum til okkar, þar sem við þurfum að skera niður eitt stöðugildi. Og eins og staðan er núna þá liggur þetta stöðugildi niðri,“ segir Gunnar Rúnar Ólafsson varaslökkviliðsstjóri. „Og það er klárt mál að í dag erum við að ganga á mannskapinn okkar, alveg út á ystu nöf, í þessu og mikið álag í fluginu.“