Athugið þessi frétt er meira en 3 ára gömul.

„Stöðvum Soros“ fyrir ungverska þingið

30.05.2018 - 05:08
epa06656115 Hungarian Prime Minister and Chairman of Fidesz Party Viktor Orban (R) and Deputy Prime Minister and Chairman of the Christian Democratic Party Zsolt Semjen sing as they celebrate the win of Fidesz and the Christian Democrats at the election
Viktor Orban fagnar sigri í þingkosningunum á sunnudag. Mynd: EPA-EFE - MTI
Ungversk stjórnvöld leggja það til að það verði ólöglegt að aðstoða ólöglega innflytjendur eða flóttamenn við að dvelja í landinu. Refsing við því gæti varðað allt að eins árs fangelsi, samkvæmt frumvarpi stjórnvalda. 

Frumvarpið nefnist „stöðvum Soros" og er liður í herferð forsætisráðherrans Viktors Orban gegn bandaríska auðjöfrinum George Soros, sem fæddist í Ungverjalandi. Flokksmenn Fidesz-flokksins, sem er við stjórnvölinn í landinu, telja Soros hvetja flóttamenn til þess að fara til Ungverjalands. 

Annað frumvarp frá stjórnvöldum liggur á borði ungverskra þingmanna. Þar er lögð fram tillaga um breytingu á stjórnarskrá landsins á þá leið að útlendingar geti ekki sótt um hæli komi þeir til Ungverjalands í gegnum þriðja land þar sem þeirra bíður ekki dómur.

Flóttamannastofnun Sameinuðu þjóðanna fordæmir frumvörpin. Þau eru sögð til þess fallin að auka fordómafulla hegðun. Óttast stofnunin að veðri lögin samþykkt eigi nauðsynleg þjónusta við fólk sem hefur neyðst til að flýja heimili sín eftir að skerðast. Eins geti þau valdið sundrung og auknum fordómum. Al Jazeera fréttastofan hefur eftir Pascale Moreau, yfirmanni Evrópudeildar Flóttamannastofnunarinnar, að þar hafi menn verulegar áhyggjur af því að ungversk stjórnvöld séu með þessu að beina sjónum sínum að fólki sem sýnir þá mannúð að aðstoða fólk í leit að skjóli.

Fidesz-flokkur Orbans vann stórsigur í ungersku þingkosningunum í apríl og heldur meirihluta sínum þar eftir að hafa hlotið nærri helming atkvæða. Í kosningabaráttunni var Orban lýst sem verndara kristinna gilda, sem hann segir ógnað af alþjóðavæðingu og innflytjendum.