Sovésk „sveitalögga“ á botni Faxaflóa

18.07.2016 - 22:44
Mynd: RÚV / RÚV
Filmurnar sem fundust á botni Faxaflóa fyrr í þessum mánuði eru úr sovéskri bíómynd frá árinu 1968. Starfsmenn Kvikmyndasafns Íslands hafa þurrkað filmurnar og skoðað þær síðustu daga.

Þann 2. júlí fengu skipverjar á humarskipinu Fróða filmur í trollið. Filmunum var komið til Kvikmyndasafns Íslands, sem rannsakaði þær nánar, eins og fréttastofa hefur greint frá. Grunur lék að myndirnar væru úr bandaríska herskipinu Alexander Hamilton, sem fórst á Faxaflóa árið 1942. 

Þurrkuðu filmurnar og færðu á klippiborð

Erlendur Sveinsson, forstöðumaður safnsins, hefur síðustu daga undið ofan af filmunum og þurrkað þær, enda sjóblautar eftir áratuga veru á hafsbotni. Því næst voru þær vafðar upp á kjarna og færðar á klippiborð til skoðunar. 

„Ég sá strax að ég myndi geta náð römmum út úr henni. Og veiddi út nokkra ramma á ljósmyndavél og gekk frá þeim síðan á Facebook síðu okkar. Og ég var svona að vona að einhver myndi reka augun í þetta,“ segir Erlendur.

Mynd: RÚV / RÚV
Umfjöllun um filmufund skipverjanna á Fróða 10. júlí síðastliðinn.

Upp úr krafsinu kom sovésk mynd

Þá var ákveðið að skanna tvær spólur sem tekist hafði að þurrka og horfa á þær.

 „Sem mér fannst náttúrulega með gríðarlegum ólíkindum. Að við værum komnir með kvikmyndir frá hafsbotni í land og það er búið að þurrka þær og koma þær í skanna og við værum að horfa á þær og skoða,“ segir Erlendur. Þegar rýnt var í myndina sáu Erlendur og félagar að um sovéska mynd væri að ræða.

„En hversu gömul hún var og það allt saman, það var náttúrulega óljóst.“

Mynd með færslu
 Mynd: RÚV
Erlendur breiddi úr filmunum til að þurrka þeir.

Sveitalögga frá kaldastríðsárunum

Í dag leystist gátan. Myndin er ekki frá því úr síðari heimsstyrjöld, heldur frá árinu 1968 - í miðju kalda stríðinu.

Það var Mikhail Timofeev sem benti á þetta á Facebook-síðu Kvikmyndasafnsins í dag. Timofeev er búsettur á Íslandi en hann sá myndina sem barn. Myndin heitir Derevenskij detekviv," eða Sveitalöggan og er frá árinu 1968 og fjallar um lögreglufulltrúann Aniskin og störf hans í litlu sveitaþorpi.

Filmufundurinn vakið mikla athygli

Fundur skipsverjanna á Fróða hefur vakið nokkra athygli. Rússneska sendiráðið sendi Kvikmyndasafninu í Moskvu fyrirspurn um myndina og Alþjóða kvikmyndasafnasambandið bauðst til að senda dreifibréf til allra 162 meðlima sambandsins, í þeirri von að finna út úr því um hvaða mynd væri að ræða. 

Það er þó á reiki hvað myndin var að gera á botni Faxaflóa en henni gæti hafa verið kastað útbyrðis úr sovésku skipi einhvern tímann á áttunda áratugnum.

 

Guðmundur Björn Þorbjörnsson
dagskrárgerðarmaður
Síðast:
Þessi þáttur er í hlaðvarpi