Sósíalistaflokkurinn ályktar um Samherjamál

19.11.2019 - 03:10
Mynd með færslu
 Mynd: RÚV
Sósíalistaflokkur Íslands sendi í gærkvöld frá sér ályktun þar sem flokkurinn ávarpar landsmenn í „tilefni af afhjúpun á glæpum Samherja í Namibíu og hvernig eigendum fyrirtækisins hefur tekist að sölsa undir sig auðlindir þarlendis, á Íslandi og víðar.“

Í ávarpinu útlistar Sósíalistaflokkurinn hvað það er sem landsmönnum ofbýður í tengslum við þetta mál og segir það vera grimmd auðvaldsins, aumingjaskap stjórnmálaelítunnar og algjört valdaleysi alþýðunnar. Krafa almennings hljóti að vera auðvaldið burt, elítuna burt og valdið til fólksins. Lausnin gegn öllu þessu kallist sósíalismi. Hann byggi samfélagið upp, á meðan auðvaldið rífi það niður.  

Ályktun allra stjórna Sósíalistaflokksins í heild sinni:

Í tilefni af afhjúpun á glæpum Samherja í Namibíu og hvernig eigendum fyrirtækisins hefur tekist að sölsa undir sig auðlindir þarlendis, á Íslandi og víðar vill Sósíalistaflokkur Íslands ávarpa landsmenn:

Það sem þér ofbýður er grimmd auðvaldsins. Krafa almennings hlýtur að vera: Auðvaldið burt! Það sem þér ofbýður er aumingjaskapur stjórnmálaelítunnar. Krafa almennings hlýtur að vera: Elítuna burt! Það sem þér ofbýður er algjört valdaleysi alþýðunnar í samfélaginu: Krafa almennings hlýtur að vera: Valdið til fólksins!

Lausnin gegn arðráni auðvaldsins, svikum elítunnar gagnvart alþýðunni og valdaleysi almennings kallast sósíalismi. Gott samfélag verður aðeins byggt upp með lýðræði sem hvílir á jöfnuði, mannhelgi og samkennd. Auðvaldið rífur niður samfélagið. Sósíalisminn byggir það upp.

 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi