Athugið þessi frétt er meira en 4 ára gömul.
Sögum um hækkandi húsaleigu fjölgar
Reynslusögur fólks af hárri húsaleigu og samskiptum við leigufélög og leigusala streyma nú inn til stéttarfélagsins VR. Ragnar Þór Ingólfsson, formaður stéttarfélagsins VR segir að húsaleiga fólksins hafi hækkað um 50 til 70% á rúmlega ári.
VR ákvað fyrir mánuði að auglýsa eftir sögum frá fólki á leigumarkaði um háa húsaleigur og samskipti þess við leigufélög og leigusala. Markmiðið var að fá frekari upplýsingar og gögn um raunverulega stöðu fólks á leigumarkaði.
„Sko, við erum búin að skrásetja inn í kerfið hjá okkur, við erum komin með svona um og yfir 50 mál og það er meira að bætast við.“
Þau leigufélög sem nefnd eru í sögum fólksins eru Almenna leigufélagið, Heimavellir, Íbúðalánasjóður, nokkur smærri leigufélög og einstaklingar sem leigja út íbúðir. Sögurnar koma alls staðar að af landinu.
Maður nokkur greiddi 115 þúsund krónur á mánuði í leigu á íbúð í eigu leigufélags. Á rúmlega ári hefur leigan verið hækkuð upp í 170 þúsund krónur.
Fjölskylda tók íbúð á leigu árið 2016 hjá leigufélagi og greiddi 225 þúsund á mánuði. Leigan var hækkuð um 25 þúsund í fyrra og í ár um aðrar 25 þúsund krónur og er nú 275 þúsund á mánuði.
Kona nokkur tók hús á leigu af leigufélagi árið 2010 og greiddi 200 þúsund krónur í leigu á mánuði. Í janúar 2017 var leigan orðin 270 þúsund. Nýlega fékk hún tilkynningu um að leigan yrði hækkuð í 400 til 450 þúsund krónur á mánuði.
„Við erum að sjá þetta 50 til 70% hækkun á leigu á rúmlega ári þar sem að fólk var að fá tilkynningar um hækkun í mars 2017 og svo aftur í mars, apríl 2018, um tug þúsunda og tug prósenta hækkanir.“
Fimmtíu þúsund manns eru á leigumarkaði á Íslandi. Í nýrri skýrslu frá Íbúðalánasjóði kemur fram að leiguverð hafi hækkað um 82% frá 2011 en laun aðeins um 66%. Ragnar segir að þessi gögn séu orðin úrelt. Leiguverð hafi hækkað gríðarlega í mars, apríl og maí.
„Það er algerlega klárt mál að löggjafinn verður að koma hérna inn í. Þarna hefur fólk enga valkosti annað en að enda á götunni ef það tekur ekki afarkostum sem þeim er boðið upp á. Þetta er svo langt umfram allar vísitölur og rauninni allt velsæmi að maður getur ekki litið á þetta öðruvísi en fjárkúgun.“
VR hyggst nota sögurnar og upplýsingarnar til að reyna að hafa áhrif á stöðu mála hér á landi.
„Það sem við ætlum að gera við þessar upplýsingar er að beita okkur fyrir því að það verði sett regluverk til verndar fólki á leigumarkaði, að neytendavernd verði elfd og síðast en ekki síst að samfélagsleg vitund þessara félaga verði í orði og á borði.“
