Snjókoma og stormur á norðvestanverðu landinu

16.03.2020 - 06:58
Mynd með færslu
 Mynd: RÚV
Margslungið veður er í kortunum þessa dagana, en versta veðurútlitið er þó á norðvestanverðu landinu með norðaustan stormi eða roki með snjókomu í dag og á morgun, en þó má gera ráð fyrir að það dúri um tíma í dag. Þetta kemur fram í hugleiðingum veðurfræðings á Veðurstofu Íslands.

Norðan- og austanlands er austan hvassviðri í fyrstu og fylgir því talsverð úrkoma fyrir austan, en sunnanlands hefur vindur snúist í hægari suðlæga átt með skúrum eða éljum.
Vindur snýst einnig til suðlægrar áttar norðan- og austanlands í dag og styttir þá upp á þeim slóðum. Bætir í vind með éljagangi norðaustanlands eftir hádegi á morgun, en fer veðrið að ganga niður annað kvöld. Þegar líður á miðvikudag ætti því að vera orðið skaplegt veður á landinu.

Fimmtudagur lítur vel út og gott að nýta hann vel til útivistar því næsta lægðakerfi nálgast úr suðvestri og má búast við miklum umhleypingum um næstu helgi.

Vegir eru víða lokaðir, annað hvort vegna ófærðar eða óveður. Hellisheiði lokuð, þar er verið að moka en óvíst er hvenær þeim mokstri lýkur. Mosfellsheiði er ófær sem og Þrengsli og Krýsuvíkurvegur.

Á Vestfjörðum eru flestir vegir lokaðir vegna ófærðar eða snjóflóðahættu. Hægt er að kynna sér ástand vega á vegagerdin.is

freyrgigja's picture
Freyr Gígja Gunnarsson
Fréttastofa RÚV
Síðast:
Þessi þáttur er í hlaðvarpi