Athugið þessi frétt er meira en mánaðargömul.

Snjóflóð féll í Langadal

11.12.2019 - 12:17
Snjóflóð í Langadal.
 Mynd: Fréttir
Snjóflóð féll á veginn í Langadal í Húnavatnssýslu norðan við brúna yfir Svartá. Flóðið er um fimmtíu metrar að breidd og tveggja metra djúpt. Ófært er í Langadal og allur snjómokstur í biðstöðu að sögn Vegagerðarinnar á Sauðárkróki.

Ekkert verður aðhafst eins og er að sögn Samhæfingarmiðstöðvar Landsbjargar. Ekki er vitað til þess að nokkur hafi lent í flóðinu, að sögn Landsbjargar. 

Stefán Vagn Stefánsson, yfirlögregluþjónn á Norðurlandi vestra, segir að Vegagerðinni hafi verið gert viðvart um snjóflóðið. Hann segir að ekki sé vitað til þess að neitt mannvirki sé á svæðinu þar sem snjóflóðið féll. Reynt verði að moka í gegnum flóðið en vegir séu allir lokaðir. „Það hefur lægt heilmikið frá í gær en enn er brjálað veður. Við vonumst til þess að í kvöld verði veður skaplegra og þá sé hægt að aðhafast betur. RARIK, Landsnet og Vegagerðin eru að gera það sem hægt er að gera þrátt fyrir mjög erfiðar aðstæður,“ segir Stefán. 

solveigk's picture
Sólveig Klara Ragnarsdóttir
Fréttastofa RÚV