Slökkvistarfi nánast lokið á Pablo Discobar

19.03.2020 - 02:24
Eldur kviknaði í skemmtistaðnum Pablo Discobar á þriðju hæð í gömlu timburhúsi við Veltusund/Ingólfstorg á tólfta tímanum að kvöldi miðvikudagins 18. mars. Allt tiltækt slökkvilið var sent á vettvang. Vel gekk að slökkva eldinn, sem breiddist ekki út til nærliggjandi húsa.
 Mynd: Bragi Valgeirsson - RÚV
Slökkvistarfi er að ljúka á skemmtistaðnum Pablo Discobar við Ingólfstorg í miðborg Reykjavíkur, og slökkviliðsmenn farnir að tínast aftur til sinna stöðva, einn af öðrum. Nokkuð lið er þó enn á staðnum og þar verður vakt til morguns. Varðstjóri hjá slökkvliðinu á höfuðborgarsvæðinu segir vel hafa gengið að ráða niðurlögum eldsins. Segir hann þetta hafa verið þónokkurn eld sem mikinn reyk lagði af og því var allt tiltækt lið kallað út.

Nýir slökkvibílar með nýju slökkvikerfi sönnuðu sig

Þar sem eldurinn logaði á þriðju hæð í gömlu timburhúsi, sem sambyggt er öðrum byggingum, bjuggust menn við hinu versta og óttuðust að hann gæti breiðst út. Það gerðist þó ekki, enda góður eldveggur milli húsa. Þá stóðu nýir slökkvibílar með nýju slökkvikerfi fyllilega undir væntingum, að sögn varðstjórans.

Heiti kerfisins, one/seven, eða einn/sjö, vísar til þess að notast er við einn hluta vatns á móti sjö hlutum froðu. „Þetta kerfi virkar greinilega vel og hefur mikinn slökkvimátt," sagði viðmælandi fréttastofu hjá slökkviliðinu.

Eldsupptök eru ókunn og ekki verður unnt að meta skemmdirnar að fullu fyrr en birtir að degi, en telja má víst að þær séu töluverðar. 
 

Ævar Örn Jósepsson
Fréttastofa RÚV
Síðast:
Þessi þáttur er í hlaðvarpi