Athugið þessi frétt er meira en 1 ára gömul.

Skjálftavirkni eykst á ný og mælingar efldar

Mynd með færslu
 Mynd: Alma Ómarsdóttir
Jarðskjálftavirkni mælist enn á svæðinu norðan við Grindavík og er yfir meðallagi. Virknin er þó minni en þegar hún var hvað mest í lok janúar, en helst hefur orðið vart við smáskjálfta að undanförnu. 

Stærsti skjálfti sl. viku mældist þó 3.2 þann 11. febrúar kl. 18:46 vestan við Þorbjörn.

Dregið hefur úr landrisi á svæðinu en ennþá mælist aflögun, segir í athugasemd jarðvísindamanns á Veðurstofunni. Mælingar hafa verið efldar við Þorbjörn, tveir nýir jarðskjálftamælar voru settir upp í vikunni sem leið, gasmælingar verða gerðar reglulega og telja vísindamenn að áfram þurfi að vakta svæðið vel.

Líklegasta skýring á þessari virkni er kvikuinnskot á 3-5 km dýpi rétt vestan við Þorbjörn, eins og áður hefur verið talað um. Líklegast er að virkninni ljúki án eldsumbrota. Næsti fundur vísindaráðs Almannavarna verður haldinn, fimmtudaginn 20. febrúar.