Athugið þessi frétt er meira en 4 ára gömul.

Skagfirskir Lionsmenn bæta lífsgæði fatlaðra

Mynd með færslu
 Mynd: Bryndís Lilja Hallsdóttir
Lífsgæði fatlaðs fólks í Skagafirði bötnuðu til muna þegar Lionsmenn þar færðu samfélaginu veglega gjöf. Það var svokallað skynörvunarherbergi, þar sem miðað er að því að hjálpa fólki með alvarlega fötlun.

Þegar Iðja, miðstöð fyrir fatlaða á Sauðárkróki, var opnuð vorið 2016 höfðu skagfirskir Lionsmenn í nokkurn tíma horft í kringum sig eftir tækifæri til að ráðast í verðugt verkefni í tilefni 100 ára afmæli hreyfingarinnar. Og við opnun Iðju, sáu þeir sér leik á borði.

Mynd með færslu
 Mynd: Bryndís Lilja Hallsdóttir
Magnús Svavarsson, Lionsklúbbi Sauðárkróks og Ásta Pálmadóttir, sveitarstjóri.

Fjórar milljónir og fjórir Lionsklúbbar

„Þá mættu þarna félagar úr Lionshreyfingunni og afhentu gjafabréf um að það yrði afhent þarna fullbúið skynörvunarherbergi," segir Magnús Svavarsson, félagi í Lionsklúbbi Sauðárkróks. Fjórir Lionsklúbbar í Skagafirði sameinuðust um gjöfina, sem metin er á um fjórar milljónir króna. Magnús tekur fram að auk Lionsklúbbanna hafi sveitarfélagið og fleiri lagt til fjármagn. „Ég efast ekki um það að þetta eigi eftir að nýtast vel," segir Magnús og Lionsmenn séu ánægðir með þeirra aðkomu. 

Mynd með færslu
 Mynd: Bryndís Lilja Hallsdóttir
Sveinn Sverrisson, sjúkraþjálfari, prófar skynörvunarherbergið

Aðstaða sem nýtist víða í samfélaginu

Skynörvunarherbergi er rými þar sem með ýmsum búnaði er hægt að örva skynfæri einstaklings í öruggu og friðsælu umhverfi. Þau hafa reynst vel einstaklingum með alvarlega fötlun, skyntruflanir, eins og nafnið bendir til. Gréta Sjöfn Guðmundsdóttir, framkvæmdastjóri málefna fatlaðs fólks í Skagafirði, segir þegar ljóst að herbergið nýtist 14 einstaklingum. Þegar fram líða stundir geti aðstaðan nýst víðar í samfélaginu og þá ekki eingöngu þeim sem sækja þjónustu Iðju.

agusto's picture
Ágúst Ólafsson
Fréttastofa RÚV