Mynd: Sjúkraflugvél Mýflugs - RÚV - Rúnar Snær Reynisson
Athugið þessi frétt er meira en 6 ára gömul.
Sjúklingi flogið til Akureyrar vegna veðurs
Sjúkraflugvél Mýflugs, sem flytja átti sjúkling frá Höfn í Hornafirði til Reykjavíkur á sjöunda tímanum í kvöld, var flogið til Akureyrar vegna veðurs. Suðvestanstormur var á suðvesturhorni landsins og allt innanlandsflug lá niðri. Þorkell Ásgeir Jóhannsson, flugstjóri hjá Mýflugi, segir að aðstæður á Reykjavíkurflugvelli hafi verið alveg á mörkum þess sem sjúkraflugvélin þolir, ef aðeins var horft til meðalvindhraða. Hins vegar hafi vindur verið byljóttur og flugbrautin blaut og hál.
Því hafi hann og aðstoðarflugstjórinn metið það svo, að ófært væri að lenda á þeim brautum Reykjavíkurflugvallar, sem til boða stóðu, eftir að suðvesturbraut vallarins var lokað. Í Keflavík var opin braut, sem lá eilítið betur við ríkjandi vindátt, að sögn Þorkels. Þar var vindstyrkur hins vegar töluvert meiri og brautin einnig blaut, þannig að í raun var jafn ófært að fljúga þangað. Til að gæta fyllsta öryggis var því flogið með sjúklinginn til Akureyrar, þar sem hann fékk aðhlynningu á Fjórðungssjúkrahúsinu.
Þorkell segir að við ríkjandi veðuraðstæður hefði ekki verið neinum vandkvæðum bundið að lenda á suðvestur-brautinni í Reykjavík, sem lokað var í sumar. Það gildir í raun einnig um samskonar braut í Keflavík, sem lokað var fyrir nokkrum árum vegna lítillar notkunar.
Innanríkisráðuneytið fékk í haust Isavia til að kanna kostnað við að opna þá braut að nýju, þegar fyrir lá að suðvesturbrautinni í Reykjavík yrði lokað. Þrjár leiðir reyndust færar varðandi endurnýjun brautarinnar í Keflavík, og mun sú, sem helst þykir koma til greina, kosta ríkissjóð um 280 milljónir króna, samkvæmt mati Isavia. Ríkissjóður fékk 440 milljónir greiddar fyrir sinn hlut í landinu undir suðvesturbrautinni í Reykjavík, þegar Reykjavíkurborg keypti það. Að auki koma viðbótargreiðslur þegar og ef lóðir á því landi verða seldar. Engin framlög til endurbóta og -opnunar suðvestur-brautarinnar í Keflavík eru tilgreind í nýafgreiddum fjáraukalögum.
