Athugið þessi frétt er meira en 5 ára gömul.

Sigurður Pálsson rithöfundur látinn

Mynd með færslu
 Mynd: Forlagið

Sigurður Pálsson rithöfundur látinn

20.09.2017 - 09:40

Höfundar

Sigurður Pálsson rithöfundur er látinn, 69 ára að aldri. Sigurður lést á líknardeild Landspítalans í gær eftir erfið veikindi.

Sigurður fæddist 30. júlí 1948 á Skinnastað í Norður-Þingeyjarsýslu. Hann lauk stúdentsprófi frá Menntaskólanum í Reykjavík og stundaði frönskunám í Toulouse og París í Frakklandi og nam leikhúsfræði og bókmenntir við Sorbonne háskóla. Þá lauk hann einnig námi í kvikmyndaleikstjórn.

Sigurður fékkst við ýmis störf. Hann var fréttaritari, leiðsögumaður og kennari og vann við sjónvarp og kvikmyndir. Sigurður fékkst þó einkum við ritstörf og þýðingar. Hann var forseti Alliance Française og formaður Rithöfundasambands Íslands.

Sigurður var einn af Listaskáldunum vondu 1976. Hann gaf út fjölmargar ljóðabækur, sú fyrsta kom út 1975 undir heitinu Ljóð vega salt. Ljóðabókin Ljóð námu völd var tilnefnd til Bókmenntaverðlauna Norðurlandaráðs árið 1993. Sigurður hlaut Íslensku bókmenntaverðlaunin fyrir Minnisbók árið 2007 og hafði þá áður verið tilnefndur fyrir ljóðabækurnar Ljóðlínuskip (1995) og Ljóðtímaleit (2001). Sigurður skrifaði einnig skáldsögur og fékkst við leikritasmíð, skrifaði sjónvarps- og útvarpshandrit og óperutexta. Ljóðabækur hans hafa verið þýddar á fjölmörg erlend tungumál, m.a. búlgörsku og kínversku. Árið 1994 kom út tvítyngd útgáfa ljóða hans hjá Editions de la Différence í París í þýðingu Régis Boyer, deildarforseta skandínavískudeildar Sorbonne háskóla. Stórt úrval ljóða Sigurðar í enskri þýðingu kom út árið 2014 undir titlinum Inside Voices, Outside Light.

Sigurður var valinn borgarlistamaður Reykjavíkurborgar á tímabilinu 1987-1990, hann hlaut riddarakross Orðu lista og bókmennta (Chevalier de l’Ordre des Arts et des Lettres) af menningarmálaráðherra Frakklands árið 1990, og Frakklandsforseti sæmdi hann riddarakrossi Frönsku heiðursorðunnar (Chevalier l’Ordre National du Mérite) árið 2007. Loks hlaut hann verðlaun Jónasar Hallgrímssonar á degi íslenskrar tungu 2016.

Á nýársdag 2017 veitti forseti Íslands Sigurði Fálkaorðuna fyrir framlag til íslenskra bókmennta og menningar. Vorið 2017 veittu Rithöfundasamband Íslands og Landsbókasafn Íslands Sigurði Maístjörnuna fyrir ljóðabókina Ljóð muna rödd en hún hefur nú verið þýdd á dönsku og norsku og er útgáfa í þeim löndum væntanleg. Úrval ljóða hans, Mit hus, kom út hjá danska bókaforlaginu Vandkunsten í vor og hefur það að geyma ljóð úr 15 bókum Sigurðar sem komu út á árunum 1975 til 2012 í þýðingu Erik Skyum Nielsen. Í byrjun árs 2018 er væntanleg önnur þýðing Sigurðar á verki eftir Nóbelsverðlaunahöfundinn Patrick Modiano, Dora Bruder.

Eftirlifandi eiginkona Sigurðar er Kristín Jóhannesdóttir kvikmyndaleikstjóri.