Athugið þessi frétt er meira en 6 ára gömul.

Siglufjarðarvegi lokað vegna skriðufalla

28.08.2015 - 08:42
Mynd með færslu
Frá Siglufirði  Mynd: Fjallabyggð - Mynd
Siglufjarðavegi var lokað í gærkvöld eftir að þrjár aurskriður féllu með skömmu millibili vestan við strákagöng - ungt par frá Reykjavík á leið til Siglufjarðar varð innlyksa milli tveggja þeirra og fékk inni hjá Jóni Trausta Traustasyni á Sauðanesi. Jón Trausti segir úrhelli hafa verið um miðnætti.

Samkvæmt upplýsingum frá lögreglunni á Dalvík hafa engar tilkynningar borist um að flætt hafi inn í hús vegna vatnsveðursins en hálfgert flóð myndaðist þó á Hvanneyrabraut þegar niðurföll réðu ekki við vatnselginn.

Fram kemur á vef Fjallabyggðar að yfirfallsræsi hafi stíflast en engar skemmdir hafi hlotist af - töluvert af smágrjóti hafi þó flotið niður eftir veginum.

Sveinn Sófaníasson, hjá vélaleigunni og steypustöðinn Bás, var að gera sig kláran til að fara skoða aðstæður á Siglufjarðaveginum. Hann segist í samtali við fréttastofu ekki vita hvernig það muni ganga því byrjað væri að rigna aftur.

Jón Trausti á Sauðanesi segist ekki gera sér grein fyrir því hversu stórar skriðurnar væru sem hefðu lokað veginum - ein þeirra gæti verið 20 til 30 metra breið. Nokkrar hefðu fallið fyrir ofan bæinn.

freyrgigja's picture
Freyr Gígja Gunnarsson
Fréttastofa RÚV