Á síðustu plötu Daða Freys var þó eitt lag sem þau sömdu og fluttu saman. „Ég er svona nýbúin að finna sönginn hjá sjálfri mér, eða þora að hleypa honum eitthvað út fyrir sturtuna,“ segir hún. Daði Freyr segist ekki verða harður upptökustjóri í hljóðverinu, „en ég segi henni alveg hvað mér finnst og við tökum stundum upp aftur og aftur.“
Þau eiga sitt eigið útgáfufyrirtæki og eiga því réttinn á allri sinni tónlist sjálf. „Samlist ehf., alltaf saman,“ segja þau hlæjandi. Þau segja markmiðið með fyrirtækinu einfalt og felist í titlinum. „Gera list. Saman. Það væri líka gaman að vera heimsfræg fyrir utan Ísland. Stefnum á að fara með þetta lengra. Sjá þau einhverja augljósa kosti í að vinna tónlist með maka sínum? „Við erum náttúrulega með sérstök tengsl sem við höfum ekki við neinn annan,“ segir Daði Freyr. „Líka gott að vera alltaf á sama staðnum. Það þarf ekki mikla utanaðkomandi vinnslu, getum unnið fullunna vöru sjálf,“ segir Árný Fjóla.
Í fjórða þætti Hljómskálans var rætt við músíkölsk pör úr íslenska tónlistarbransanum. Hægt er að horfa á þáttinn í heild sinni í spilara RÚV.
