Segir mótmæli gærdagsins „skipulagðar óeirðir“

13.06.2019 - 02:16
epa07643131 A protester falls down reacting on police during a rally against an extradition bill outside the Legislative Council in Hong Kong, China, 12 June 2019. The bill, scheduled for a second reading on 12 June has faced immense opposition from pan-democrats, the business sector, and the international community, would allow the transfer of fugitives to jurisdictions which Hong Kong does not have a treaty with, including mainland China. Critics of the bill have expressed concern over unfair trials and a lack of human rights protection in mainland China.  EPA-EFE/VERNON YUEN
 Mynd: EPA-EFE - EPA
Carrie Lam, æðsti embættismaður kínverska sjálfstjórnarhéraðsins Hong Kong, segir mótmæli síðustu daga gegn nýrri og afar umdeildri framsalslöggjöf sem heimilar framsal Hong Kong-búa til meginlands Kína, ekkert annað en „skipulagðar óeirðir." Segir hún að átökin sem brutust út milli mótmælenda og óeirðalögreglu í gær séu „algjörlega óásættanleg í öllum siðuðum samfélögum." 72 manneskjur á aldrinum 15 til 66 ára slösuðust í átökunum, þar á meðal tveir karlmenn sem hlutu lífshættuleg meiðsl.

Lögregla gekk fram af mikilli hörku og beitti hvort tveggja táragasi og kylfum óspart. Fresta þurfti annarri umræðu um nýju löggjöfina á löggjafarsamkundu Hong Kong í gær vegna mótmælanna við þinghúsið, en um helgina tóku allt að milljón manns þátt í friðsamlegum mótmælum af sama tilefni. Þrátt fyrir þetta segir Lam ekki koma til greina að hvika frá hinni boðuðu löggjöf.

Gagnrýnendur laganna benda á að pyntingar, handahófskenndar fangelsanir og þvingaðar játningar séu daglegt brauð á kínverska meginlandinu, þar sem hver sem er geti átt von á því að vera handtekinn og dæmdur fyrir það eitt að gagnrýna kínverska kommúnistaflokkinn og stjórnvöld í Peking. Þannig megi allt eins búast við því að nýju lögin verði notuð til að auðvelda alræðisstjórninni á meginlandinu að múlbinda gagnrýnendur sína í Hong Kong.

Þótt annarri umræðu um lögin hafi verið frestað um hríð er gert ráð fyrir að þau verði samþykkt þegar atkvæði verða greidd um þau hinn 20. þessa mánaðar.