Athugið þessi frétt er meira en 6 ára gömul.

Segir framlag til RÚV skila auknum tekjum

20.12.2015 - 15:04
R
 Mynd: RÚV
Ríkisútvarpið getur sótt fram á ýmsan hátt þrátt fyrir lækkun útvarpsgjalds að mati Sigmundar Davíðs Gunnlaugssonar forsætisráðherra. Útvarpsgjaldið lækkar um 1.400 krónur um áramót. Útvarpsstjóri segir það mikil vonbrigði. Ríkisútvarpið fær 175 milljónir króna í sérframlag sem verja á til framleiðslu á innlendu efni. Forsætisráðherra segir að framlagið muni skila auknum tekjum.

Sigmundur Davíð segir að það hafi ekki verið vilji fyrir hendi hjá þingflokkunum að hækka gjaldskrár. „Það á meðal annars við um þetta gjald en með þessari lausn menntamálaráðherra er verið að bæta í, sérstaklega í framleiðslu á íslensku efni,“ segir Sigmundur Davíð.

Hann segir að auk þess megi ekki gleyma því að það muni skila auknum auglýsingatekjum og jafnvel sölu á þessu efni til Norðurlandanna, Þýskalands og annarra landa. „Þannig að á heildina litið þá verða þetta miklu meiri tekjur en þessar 175 milljónir.“

En það blasir við erfið fjárhagsstaða hjá Ríkisútvarpinu þegar útvarpsgjaldið er lækkað, sérðu fyrir þér hvernig það á að bregðast við því? „Það verður auðvitað samið um það við menntamálaráðherrann með þjónustusamningi. Í þeim samningi geri ég ráð fyrir að menn taki tillit til aðstæðna en með þessari lausn ráðherrans þá á að vera hægt að sækja fram á ýmsan hátt.“