Seðlabankinn veitir enn engin svör

Seðlabankinn lýsti því yfir í síðustu viku að hann væri tilbúinn að leyfa nefndarmönnum að lesa útskrift af símtalinu. Þeir fengju þó ekki að halda eintökum af því og ekki vitna beint til þess í opinberum skýrslum. Skilningur nefndarinnar virðist hafa verið að þetta þýddi að hún fengi að sjá útskriftina. Upplýsingafulltrúi Seðlabankans hefur á hinn bóginn ítrekað sagt að heimildir til að birta nefndinni upptökuna liggi ekki fyrir. Björn Valur Gíslason, formaður fjárlaganefndar, segist hafa gengið á eftir svari frá bankanum um birtinguna en samkvæmt upplýsingum frá Seðlabankanum í dag hefur ekkert nýtt gerst í málinu. Þeir sem fréttastofa hefur rætt við telja líklegt að vegna persónuverndarsjónarmiða þurfi að biðja Geir H. Haarde um leyfi til að nefndin fái að lesa útskrift af símtalinu.