Athugið þessi frétt er meira en 4 ára gömul.

Samgönguáætlun vonbrigði

Mynd með færslu
 Mynd: RÚV
Samgönguáætlun er vonbrigði, segir framkvæmdastjóri Sambands sveitarfélaga á Suðurnesjum. Þá geti gjaldtaka verið of íþyngjandi fyrir íbúa á Suðurnesjum. Varaformaður samgöngunefndar Alþingis segir samgönguáætlun gefi vonir um dýrar framkvæmdir eftir fimm til fimmtán ár sem ekki verði hægt að standa við.

Hundrað og sextíu milljörðum verður varið til nýframkvæmda og viðhalds vega og samgöngumannvirkja á næstu fimm árum. Samgönguráðherra kynnti í gær lauslega samgönguáætlun til næstu fimmtán ára.

„Svo ég kannski horfi á það sem okkur snýr, þá er samgönguáætlun nokkur vonbrigði. Það á ekki að ljúka við tvöföldun á Reykjanesbrautinni fyrr en 2033. Og í því samhengi er kannski rétt að nefna það að nýskráning á dísel- og bensínbílum verður bönnuð árið 2030, þannig að þetta bann verður búið að vera í gildi í 3 ár ef fer fram sem horfir. Við erum líka að sjá ISAVIA er að gera ráð fyrir því að það verði 10 milljónir farþega sem fari um Keflavíkurflugvöll á þessu ári. Árið 2033 er gert ráð fyrir að það verði 18 milljónir farþega og maður spyr sig hvernig á að koma þessu fólki til og frá. Þetta snýr ekki eingöngu að íbúum á þessu svæðis heldur er þetta bara öryggi allra sem fara hérna um Reykjanesbrautina,“ segir Berglind Kristinsdóttir, framkvæmdastjóri Sambands sveitarfélaga á Suðurnesjum.

Berglind segir að umferðarteppur myndist oft á brautinni. 

„Reykjanesbrautin sem fer í gegnum Reykjanesbæ, sker hann í tvennt, þar eru ekki mislæg gantamót. Það er búið að setja hringtorg en það kom í kjölfarið á dauðaslysum og okkur finnst þetta einfaldlega of hátt verð að greiða,“ segir Berglind.

Samgönguráðherra sagði í fréttum RÚV í gær að flýta mætti einstökum framkvæmdum á Samgönguáætlun með því að taka upp gjaldtöku.

„Fólk er að sækja vinnu og skóla á höfuðborgarsvæðið og þetta gæti orðið íþyngjandi fyrir okkar íbúa,“ segir Berglind.

Fyrrverandi samgönguráðherra og núverandi varaformaður umhverfis- og samgöngunefndar Alþingis tekur undir með núverandi samgönguráðherra að taka þurfi upp gjaldtöku. 

„Taka þessar stóru fjárfreku framkvæmdir út fyrir sviga, fjármagna þær með gjaldtöku, síðan að jafna þeirri gjaldtöku á landsmenn,“ segir Jón Gunnarsson, fyrsti varaformaður umhverfis- og samgöngunefndar Alþingis.

Þannig megi stíga stærri skref í vegaframkvæmdum. Samgönguáætlunin er til fimmtán ára og er skipt niður í þrjú tímabil.

„Hún er mjög afturþung þessi áætlun eins og hún lítur. Mér finnst engar forsendur vera fyrir því sem reiknað með á tímabili 2 og 3 sem er eftir fimm til tíu ár og tíu til fimmtán ár. Þar er gert ráð fyrir verulegri aukningu í framlögum frá því sem er á fyrsta tímabili. Ég sé ekki neinar væntingar í ríkisfjármálum sem geta stutt við þá áætlun. Þannig að það er líka ljóst að það er verið að sýna á einhver spil sem ekki verður hægt að standa við nema til komi eitthvað alveg sérstakt og nýtt,“ segir Jón.