Athugið þessi frétt er meira en 2 ára gömul.

Rússneskar sprengjuflugvélar við landið

18.03.2019 - 16:30
Mynd með færslu
Tupolev Tu-142. Mynd úr safni.  Mynd:
Tvær rússneskar sprengjuflugvélar af gerðinni Tupolev Tu-142 (Bear F) komu inn í loftrýmiseftirlitssvæði Atlandshafsbandalagsins við Ísland í morgun. Vélarnar höfðu ekki verið tilkynntar til flugumferðarstjórnar og ratsjárvarar voru ekki í gangi. Þetta kemur fram í tilkynningu frá Landhelgisgæslunni.

Í samræmi við vinnureglur Atlantshafsbandalagsins var tveimur orrustuþotum ítalska flughersins, sem eru hér á landi við loftrýmisgæslu, flogið til móts við vélarnar til að auðkenna þær. 

Rússnesku vélarnar voru innan loftrýmiseftirlitssvæðis NATO en utan íslenskrar lofthelgi. Rússneskar herflugvélar flugu síðast inn á loftrýmiseftirlitssvæðið í desember 2018 en eru oft á ferð undan ströndum Noregs, að því er fram kemur í tilkynningu Landhelgisgæslunnar.

Loftrýmisgæsla Atlantshafsbandalagsins við Ísland stendur nú yfir og kom flugsveit ítalska flughersins nýlega til landsins. Verkefnið heyrir undir svæðisstjórnstöð NATO í Uedem í Þýskalandi. Landhelgisgæslan ber ábyrgð á framkvæmdinni hérlendis, í samvinnu við Isavia. Ítalska flugsveitin er með fjórar Eurofighter Typhoon EF-2000 orrustuþotur.

dagnyhe's picture
Dagný Hulda Erlendsdóttir