Mynd: Samsett mynd - RÚV
Athugið þessi frétt er meira en 6 ára gömul.
Róbert og Brynhildur hætt í Bjartri framtíð
Róbert Marshall og Brynhildur Pétursdóttir, fyrrverandi þingmenn Bjartrar framtíðar, sögðu sig bæði úr flokknum í morgun. Þau segja bæði að ákvörðunin hafi ekkert með stjórnmál eða yfirstandandi stjórnarmyndunarviðræður að gera, heldur ætli þau bæði að snúa sér að öðru. Hvorugt þeirra hafði ætlað sér að taka sæti á Alþingi eftir kosningarnar í haust.
Róbert segir í samtali við fréttastofu að hann ætli að snúa sér að nýju að verkefnum tengdum fjölmiðlum, en hann á langan feril að baki á þeim vettvangi. Brynhildur ætlar að sinna verkefnum sem tengjast neytendamálum, en hún vann áður hjá Neytendasamtökunum.
Róbert var þingmaður frá 2009 til 2016, fyrst fyrir Samfylkinguna og síðar fyrir Bjarta framtíð. Róbert var formaður þingflokks Bjartrar framtíðar frá 2013 til 2015.
Brynhildur sat á þingi fyrir Bjarta framtíð frá 2013 til 2016 og var formaður þingflokksins frá 2015 til 2016.
