Guðmundur Ingi Kristinsson, Flokki fólksins. Mynd: RÚV
Athugið þessi frétt er meira en 3 ára gömul.
Ríkisstjórnir gleymi öryrkjum eftir kosningar
Guðmundur Ingi Kristinsson, þingmaður Flokks fólksins, segir gleymsku hrjá ríkisstjórnarflokkana og líka fyrri ríkisstjórnir. Þeir gleymi öryrkjum um leið og kosningar séu afstaðnar og þar að auki séu hækkanir til öryrkja aldrei afturvirkar. Gleymskan sé alvarleg og tilefni sé til að senda ríkisstjórnina á minnisnámskeið.
„Þessi ríkisstjórn og fyrri ríkisstjórnir gleyma alltaf öryrkjum. Menn lofa og lofa fyrir kosningar, en um leið og kosningarnar eru afstaðnar þá gleyma þeir. Þeir gleyma algjörlega. Öryrkjar og eldri borgarar fá aldrei afturvirkar hækkanir. Aldrei. Hafa aldrei fengið afturvirkt. Allir aðrir fá afturvirkar hækkanir.“
Guðmundur Ingi gagnrýndi sömuleiðis að allir launþegar hækki í launum samkvæmt launavísitölu en hjá öryrkjum er miðað við neysluvísitölu. Hann sagði að fyrirspurn hefði verið lögð fram til fjármálaráðherra um persónuafslátt fyrir sex vikum en engin svör borist.„ Sex vikur. Ekkert heyrst. Engin afsökun. Ekkert. Ekki beðið um frest. Sex vikur. Ég held að það sé alvarleg gleymska í gangi hjá þessari ríkisstjórn og hún þurfi að fara á minnisnámskeið,“ sagði Guðmundur Ingi Kristinsson á Alþingi í dag.
