Athugið þessi frétt er meira en 5 ára gömul.

Rafmagni hleypt á Kröflulínu 4

21.09.2017 - 19:19
Mynd með færslu
 Mynd: RÚV - Ágúst Ólafsson
Rafmagni var í fyrsta sinn hleypt á Kröflulínu fjögur í dag. Þessi umdeilda háspennulína er því tilbúin til notkunar. Það þýðir að nú er hægt að hefja prófanir á Þeistareykjavirkjun og raforkuframleiðslu þar.

Tæknimenn Landsnet fylgdust með því í dag, í nýju tengivirki fyrirtækisins við Kröflu, allt gengi að óskum þegar rafstraumi var hleypt á Kröflulínu 4. Línan er önnur af tveimur 220 kílóvolta háspennulínum sem byggðar eru vegna raforkuflutninga frá Þeistareykjavirkjun.

Þýðingamikill áfangi í stóru verkefni   

Framkvæmdir við Kröflulínu 4 hófust um mitt ár 2016. Nú er rafmagn í fyrsta sinn flutt eftir línunni og þetta eru lokaprófanir á henni. „Í flóknum verkefnum má búast við að það þurfi að lagfæra eitthvað eftir spennusetninguna, en ekki neitt verulegt, “ segir Guðmundur Ingi Ásmundsson, forstjóri Landsnets. „Það hefur mjög mikla þýðingu fyrir heildarverkefnið, við uppbygginguna á Bakka og Þeistareykjavirkjun, að hún sé tilbúin núna. Nú getur Landsvirkjun hafist handa við að prófa Þeistareykjavikjun þannig að þeir geti staðið við sínar áætlanir gagnvart viðskiptavinum sínum niðri á Bakka.“

Ein umdeildasta línuframkvæmd síðari ára

Bygging Kröflulínu fjögur er ein umdeildasta línuframkvæmd síðari ára. Fjöldi kærumála og allskyns lögbannskröfur voru uppi á meðan á framkvæmdum stóð. Og þó öll kærumál hafi nú verið til lykta leidd er enn uppi sú krafa að friðlýsa Leirhnjúkshraun sem línan liggur um. Því er spurning hvort færa þurfi línuna ef hraunið verður friðlýst. „Friðlýsingar hafa alltaf ákveðna skilmála í för með sér. Það eru fordæmi fyrir því að orkumannvirki séu innan friðlýstra svæða. Ég get í rauninni ekki svarað því á þessari stundu,“ segir Guðmundur Ingi.

Verkið á áætlun þrátt fyrir tafir á framkvæmdatíma

En þrátt fyrir ýmsar tafir vegna málaferla og krafna um lögbann, segir Guðmundur verkinu skilað sem næst á tilsettum tíma. Og líklega verði kostnaður við byggingu línunnar lægri en áætlað var. “Við stöndum hérna í dag og stöndum nokkurnveginn áætlun sem er afskaplega mikið gleðiefni fyrir okkur.“