Athugið þessi frétt er meira en 2 ára gömul.

Ræða innanlandsflug við talsmenn flugfélaga

29.08.2019 - 06:55
Mynd með færslu
 Mynd: RÚV
Fulltrúar flugfélaga og Isavia mæta á fund umhverfis- og samgöngunefndar Alþingis í dag. Þá kemur nefndin saman til að ræða stöðu innanlandsflugs á Íslandi. Farþegum í innanlandsflugi hefur fækkað um tíu prósent og munar mest um erlenda farþega sem hefur fækkað um 30 til 40 prósent.

Stærstu flugfélög í innanlandsflugi hafa ákveðið að draga saman seglin og hefur Air Iceland Connect fækkað flugvélum sínum um þriðjung. Fundurinn í dag er að beiðni Vilhjálms Árnasonar, þingmanns Sjálfstæðisflokksins. Hann segir stöðuna alvarlega þegar bæði stóru flugfélögin verði að draga úr flugframboði þegar menn vildu frekar efla innanlandsflugið. 

„Við höfum ákveðnar leiðir sem við höfum lagt fram umhverfis- og samgöngunefndin sem er svokölluð skoska leiðin, sem við leggjum til í nýsamþykktri samgönguáætlun,“ segir Vilhjálmur. „Við viljum fá að vita hvort það að flýta innleiðingu skosku leiðarinnar eins og hægt er myndi hjálpa eða hvort að það sé eitthvað fleira sem við þurfum að gera til að bæta þessa erfiðu stöðu sem innanlandsflugið er komið í.“ Skoska leiðin sem hann nefnir gengur út á ríkið niðurgreiði flugfargjöld þeirra sem búa fjarri höfuðborginni.