Ráðuneyti harmar framkvæmd samræmdra prófa

Mynd með færslu
 Mynd: RÚV
Mennta- og menningarmálaráðuneyti harmar að framkvæmd samræmdra prófa í íslensku í 9. bekk hafi mistekist með tilheyrandi óþægindum fyrir nemendur og kennara. Þetta kemur fram í fréttatilkynningu frá ráðuneytinu.

Mennta- og menningarmálaráðherra átti fund með Arnóri Guðmundssyni, forstjóra Menntamálastofnunar, síðdegis í gær þar sem farið var yfir umfang og ástæður vandans. Í tilkynningunni segir að forstjóri Menntamálastofnunar hafi á fundinum upplýst að tæknileg mistök hjá þjónustuaðila prófkerfisins hafi orðið til þess að prófið var ekki fært yfir á afkastameiri netþjón. Hann greindi einnig frá því að þegar vandamálið kom í ljós hafi Menntamálastofnun sett í gang viðbragðsáætlun og að áhersla hafi verið lögð á að upplýsa alla um stöðuna. 

Mennta- og menningarmálaráðherra hefur boðað til fundar með öllum helstu hagsmunaaðilum miðvikudaginn 14. mars þar sem ákveðið verður hvernig unnið verði úr stöðu mála í tengslum við samræmt könnunarpróf í íslensku. „Hagsmunir nemenda verða hafðir að leiðarljósi í því mati,“ segir í tilkynningunni.

Samræmd próf í ensku standa nú yfir og ganga samkvæmt áætlun. Á morgun verða samræmd próf í stærðfræði.

dagnyhe's picture
Dagný Hulda Erlendsdóttir
Síðast:
Þessi þáttur er í hlaðvarpi