PCC harmar slagsmálin í vinnubúðum á Bakka

06.11.2018 - 11:46
Mynd með færslu
 Mynd: RÚV - Björgvin Kolbeinsson
Í yfirlýsingu frá PCC harmar fyrirtækið þann atburð sem átti sér stað í vinnubúðum á Bakka síðstliðinn laugardag. Þá kom til harkalegra átaka tveggja manna og voru báðir fluttir á sjúkrahús með áverka.

Mennirnir voru starfsmenn verktaka í kísilveri PCC á Bakka, en í yfirlýsingunni segist PCC vera með marga starfsmenn sem og verktaka við vinnu hjá fyrirtækinu.

„Almennt leitast PCC ekki við að hlutast til um einkalíf starfsmanna sinna né annarra verktaka sem vinna fyrir fyrirtækið. PCC lítur á vinnubúðirnar sem heimili þeirra sem þar dvelja. Dvöl þar fylgir skuldbinding við almennar umgengnisreglur og óþarfi er að taka fram að atburðir eins og nú um ræðir fara langt út fyrir þær reglur,“ segir orðrétt í yfirlýsingunni.

Þar kemur einnig fram að dótturfyrirtæki PCC SE sé með þessar vinnubúðir á leigu vegna mikils skorts á íbúðarhúsnæði á Húsavík. Um bráðabirgðaúrræði sé að ræða og PCC hafi lagt duglega af mörkum til uppbyggingar húsnæðis á svæðinu.

„Ekki leikur vafi á að þeir alvarlegu atburðir sem áttu sér stað í vinnubúðunum um helgina feli í sér refsiverða háttsemi sem lögregla hefur brugðist við og komið í eðilegan farveg. Vinnuveitandi þeirra starfsmanna sem eiga hlut að máli hefur nú þegar gert ráðstafanir vegna málsins. PCC mun ekki tjá sig frekar um málið þar sem rannsókn er í höndum lögreglunnar,“ segir PCC vegna málsins.

agusto's picture
Ágúst Ólafsson
Fréttastofa RÚV
Síðast:
Þessi þáttur er í hlaðvarpi