Athugið þessi frétt er meira en 2 ára gömul.

Óttast að 150 hafi drukknað undan Líbíuströnd

A body of a drowned migrant is seen on a coast some 100 kilometers (60 miles) east of Tripoli, Libya, Thursday, July 25, 2019. The U.N. refugee agency and the International Rescue Committee say up to 150 may have perished at sea off the coast of Libya. The country's coast guard says the Europe-bound migrants are missing and feared drowned after the boats they were traveling on capsized in the Mediterranean Sea. A spokesman says they rescued around 137 migrants on Thursday. (AP Photo/Hazem Ahmed)
Lík eins hinna drukknuðu flóttamanna í líkpoka á Líbíuströnd, um 100 kílómetra austur af Trípólí Mynd: AP
Óttast er að um eða yfir 150 manns hafi drukknað þegar bátur, yfirfullur af flóttafólki á leið til Evrópu, sökk undan Líbíuströnd í gær, fimmtudag. Er þetta að líkindum mannskæðasta slysið af þessu tagi það sem af er ári.

Talið er að minnst 250 hafi verið um borð í bátnum þegar hann sökk, ekki fjarri hafnarborginni Khoms, sem er um 120 kílómetra austur af Trípólí. Talsmaður líbíska flotans greindi þýsku fréttastofunni dpa frá þessu og sagði 134 hafa verið bjargað úr sjónum. 

„Mesti harmleikur ársins á Miðjarðarhafinu“

Filippo Grandi, forstjóri Flóttamannastofnunar Sameinuðu þjóðanna, segir hins vegar á Twitter að óttast sé að yfir 150 hafi drukknað, þar á meðal konur og börn, en 145 verið bjargað og flutt aftur í land í Líbíu, í „mesta harmleik ársins á Miðjarðarhafinu.“

Hvetur hann Evrópuríki til að hefja skipulögð björgunarstörf á Miðjarðarhafinu á nýjaleik og stjórnvöld í Líbíu til að loka öllum búðum í landinu, þar sem flótta- og förufólki er haldið nauðugu. Segir hann brýnt að koma upp öruggum flóttaleiðum frá Norður-Afríku „áður en það verður um seinan fyrir miklu fleira örvæntingarfullt fólk.“

Fólkinu sem komst lífs af þegar báturinn sökk var bjargað um borð í fiskibáta en flutt í land í bátum strandgæslunnar. Nær 700 dauðsföll flóttafólks á leið yfir Miðjarðarhafið hafa verið skráð það sem af er þessu ári, og eru fórnarlömb slyssins á fimmtudag ekki inni í þeirri tölu. Ríflega 1.400 dauðsföll voru skráð á þessari flóttaleið allt árið í fyrra.