Athugið þessi frétt er meira en 5 ára gömul.

Óskar samstarfs við Umhverfisstofnun

25.04.2017 - 07:20
Mynd með færslu
 Mynd: rúv
Stjórnendur United Silicon í Helguvík gera ekki athugasemdir við ákvörðun Umhverfisstofnunar um að heimila ekki gangsetningu verksmiðjunnar nema í samráði við stofnunina. Þeir óska eftir samstarfi við Umhverfisstofnun um endurræsingu verksmiðjunnar og rannsóknir í framhaldi af því, sem United Silicon muni greiða fyrir.

Þetta kemur fram í fréttatilkynningu United Silicon í morgun. Hún er svar við ákvörðun Umhverfisstofnunar frá í síðustu viku um að ekki megi gangsetja verksmiðjuna á ný nema að höfðu samráði við stofnunina. Þá ákvörðun tók Umhverfisstofnun eftir eldsvoða í verksmiðjunni í síðustu viku. Fyrir þann eldsvoða var Umhverfisstofnun komin á fremsta hlunn að banna gangsetningu verksmiðjunnar nema að höfðu samráði, en féll frá því gegn fyrirheitum stjórnenda United Silicon um að þeir tækju ábyrgð á gangi mála.

Í fréttatilkynningu United Silicon segir að fyrirtækið hafði samið við norska ráðgjafarfyrirtækið Multikonsult um að gera tillögur að endurbótum. Frumrannsókn þess fyrirtækis bendi til að ekki sé um stórfellda galla að ræða og að verksmiðjan geti náð fullum afköstum. Þá hefur fyrirtækið samið við norsku loftrannsóknastofnunina Norsk institutt for luftforskning um mælingar á loftgæðum í nágrenni verksmiðjunnar þegar ljósbogaofninn verður ræstur á ný. United Silicon óskar eftir því við Umhverfisstofnun að hún stöðvi ekki rekstur ljósbogaofnsins eftir að hann verður ræstur á ný nema fyrir liggi röskstudd og vísindaleg niðurstaða um að rekstrinum starfi hætta af honum. Það sé vegna þess að mun erfiðara sé að vinna að mengunarvörnum þegar rekstur ljósbogaofnsins liggur niðri.