Ósátt við að fá ekki boð í leiðtogaumræður

Mynd með færslu
 Mynd: RÚV
Forsvarsmenn Alþýðufylkingarinnar eru ósáttir við að fá ekki að taka þátt í leiðtogaumræðum í kvöld. Aðeins fulltrúar þeirra flokka sem bjóða fram á landsvísu taka þátt í leiðtogaumræðunum í sjónvarpinu i kvöld sem hefjast klukkan 19:45.

Yfirlýsing Alþýðufylkingarinnar í heild: 

Yfirlýsing Alþýðufylkingarinnar vegna kosningaumfjöllunar 2017

Alþýðufylkingin lýsir yfir megnustu vanþóknun á þeirri mismunun sem framboðið hefur orðið fyrir af hálfu bæði fjölmiðla og félagasamtaka. Við höfnum þeim viðbárum að ekki taki því að hlusta á flokka sem mælast með lítið fylgi í skoðanakönnunum; þvert á móti stuðlar það útiloka flokka á borð við Alþýðufylkinguna, á fundum og í fjölmiðlaumfjöllun, einmitt að því að boðskapur flokksins fái ekki tilhlýðilega athygli og kjósendur eigi því erfiðara með að mynda sér skoðun á honum.

Nú tekur steininn úr: RÚV hefur ákveðið að banna Alþýðufylkingunni að taka þátt í síðari leiðtogaumræðu í sjónvarpi, án þess að neinnar málefnalegrar ástæðu sé getið. Þessi þáttur er kvöldið fyrir kosningar og er trúlega sá einstaki útsendingarliður kosningaumfjöllunarinnar sem skiptir mestu um úrslit kosninganna. Að banna okkur þátttöku er gróf aðför að lýðræðislegu framboði. Um leið er það aðför að sjálfu lýðræðinu í landinu, þar sem það hlýtur að vera ein af forsendum lýðræðisins að kjósendur geti jafnauðveldlega myndað sér skoðun á boðskap þeirra flokka sem bjóða fram!

 

Bjarni Pétur Jónsson
Fréttastofa RÚV
Síðast:
Þessi þáttur er í hlaðvarpi