Mynd: Ölgerðin
Athugið þessi frétt er meira en 3 ára gömul.
Ölgerðin segir upp 25 starfsmönnum
Ölgerðin mun fækka starfsmönnum sínum um 25, þvert á öll svið fyrirtækisins, segir í frétt á heimasíðu Ölgerðarinnar. Ástæðan sé einföldun í rekstri þar sem hluta lagerstarfsemi og dreifingar verði útvistað. Hluta starfsmannanna bjóðist að taka við störfum í tengslum við útvistunina.
Í tilkynningu á vefsíðu fyrirtækisins segir að rekstur Ölgerðarinnar Egils Skallagrímssonar verði einfaldaður og hluta lagerstarfsemi og dreifingar útvistað „til að takast á við vaxandi umsvif og auka sveigjanleika". Ölgerðin verði frá og með næstu mánaðamótum alhliða drykkjarvörufyrirtæki en allur annar innflutningur verður á sama tíma hjá dótturfyrirtækinu Danól.
„Starfsemi okkar hefur margfaldast á undanförnum árum og síkvikt viðskiptaumhverfi kallar á að fyrirtæki leiti allra leiða til að gera hlutina betur, auka möguleika til vaxtar, hagræða og styrkja sig enn frekar á markaði. Fyrirtæki sem fylgist ekki með breytingum og aðlagar sig ekki að nýjum aðstæðum verður í vanda og við höfum óhikað tekið ákvarðanir sem þessar til að halda okkur í fremstu röð,“ segir Andri Þór Guðmundsson, forstjóri, í tilkynningunni. Ölgerðin ætli að styrkja eigin framleiðslu og innflutning á drykkjarvöru en Danól verði með alla matvöru, snyrti- og sérvörur, ásamt vörum til stóreldhúsa.
Starfsemi Danól verður í framhaldi flutt í húsnæði gegnt Ölgerðinni á Fosshálsi.
