Athugið þessi frétt er meira en 3 ára gömul.

Milda hjartað plötuumslag ársins

Mynd:  / 

Milda hjartað plötuumslag ársins

12.03.2019 - 20:35

Höfundar

Umslag plötunnar Milda hjartað með Jónasi Sig hlýtur verðlaunin fyrir umslag ársins á Íslensku tónlistarverðlaununum. Jónatan Grétarsson tók ljósmynd af tónlistarmanninum sem prýðir umslagið en Ámundi Sigurðsson sá um hönnun.

Íslensku tónlistarverðlaunin verða afhent á miðvikudagskvöld en í Menningunni var tekið forskot á sæluna og tilkynnt hver hreppti hnossið í flokknum umslag ársins.

Aðrar tilnefningar voru: 

• The Vintage Caravan – Gateways
• Jóel Pálsson – Dagar koma
• Skálmöld – Sorgir
• Umbra – Sólhvörf

Jónas segir verðlaunin koma sér ánægjulega á óvart. Hann segir plötuna vera persónulega og því vildi hann að plötuumslagið endurspeglaði það. 

„Ég hef sjálfur verið hrifinn af plötualbúmum þar sem tónlistarmaðurinn er sjálfur berskjaldaður, ekki í einhverri glansmynd heldur er bara þarna. Mér finnst það henta fyrir þessa tegund tónlistar, frá hjarta til hjarta. Ég vildi hafa þessa persónulegu tengingu, að hún myndi standa og falla með því að vera einlæg frásögn manns til fólks sem væri að hlusta á plötuna.“

Mynd með færslu

Jónatan Grétarsson tók myndina og segir að lykillinn að myndinni hafa verið titill plötunnar.  „Mér fannst Jónas gefa svo mikið af sér í myndatökunni og milda hjartað skína í gegn á þessari mynd.“ 

Koparliturinn í bakgrunninum er liturinn á eldhúsinnréttingu í ljósmyndastúdíói Jónatans.  „Þetta var eiginlega þannig að Jónas kemur, ég horfi á hann og svo eldhúsinnréttinguna; bið hann um að standa framan innréttinguna, náði í símann og smellti af. Hugsaði með mér að þetta gæti virkað. Náði í málningu og málaði vegg, lét hann þorna, það tók fimm mínútur. Tók svo sjö rammar, sá fjórði var fullkominn og þá hættum við.“

Ámundi Sigurðsson tók síðan við myndinni og hannaði umslagið. „Þetta er svo brilliant mynd og það var eiginlega erfiðast að gera sem minnst. Ég gerði nokkrar tillögur. Jónas valdi þessa og ég er mjög sáttur eftir á, ég var ekki alveg jafn sáttur þá. Þetta er bara látlaust og passar við músíkina. Þetta var ekkert erfitt, ég var eins og kokkur með gott hráefni.“

Jónas Sig er tilnefndur í fjórum öðrum flokkum á Íslensku tónlistarverðlaununum, sem verða sýnd í beinni útsendingu á RÚV miðvikudaginn 13. mars. Þau hefjast á RÚV2 klukkan 18:30 en færast yfir á aðalrásina klukkan 19:55.  

Tengdar fréttir

Tónlist

Tilnefningar til tónlistarverðlaunanna kynntar

Tónlist

Breytt tónlistarverðlaun á rafrænum tímum