Athugið þessi frétt er meira en 2 ára gömul.

Makt myrkranna

Mynd: Kælan mikla / RÚV

Makt myrkranna

22.05.2019 - 17:30

Höfundar

Platan Nótt eftir nótt er þriðja hljóðversplata hljómsveitarinnar Kælunnar Miklu. Arnar Eggert Thoroddsen rýnir í verkið, sem er plata vikunnar á Rás 2.

Kælan Mikla hefur vaxið jafnt og þétt í gegnum árin enda slípa þær stöllur steininn frá morgni til kvölds (og fram á nótt) en sveitina skipa þær Sólveig Matthildur, Margrét Rósa og Laufey Soffía. Skuggabylgjan svokallaða („darkwave“) er kirfilegur grunnur að tónlist sveitarinnar, en hún er hjúpuð drungalegum, gotarokkslegum blæ með sterkri skírskotun til upphafs níunda áratugarins, og á köflum eins og eitt langt tilbrigði við Faith-plötu The Cure. Fyrri verk Kælunnar hafa verið brokkgeng, lög sannarlega misspennandi og oft æði ófrumleg. Eitt og annað sem þarfnaðaðist fínpússningar, nokkuð sem kemur venjulega með reynslu.

Nótt eftir nótt er engan veginn stílbrot frá því sem verið hefur, það er haldið áfram með sama kúrs en svo gott sem allt hérna er betra, fumlausara og straumlínulagaðra en áður. Lög eru betri, þéttari einhvern veginn, og rúlla áreynslulaust áfram. Hugsað er fyrir flæðinu á milli versa og viðlaga og stelpurnar eru vakandi fyrir hvernig hægt er að nýta hljóðáhrif; hvort heldur sem er í inngangi laga eða innan um hljóðfæraganginn. Spilamennskan er líka orðin betri og gripurinn allur hinn stöndugasti. Ég heyri í The Cure, Siouxsie and the Banshees, Rammstein, NIN og jafnvel Depeche Mode, og þetta er einfaldlega meira „fullorðins“ en hefur verið. Eðlilega.

Korter

Ég er svona korter frá því að segja að bandið sé tilbúið fyrir leikvangana! Tökum lag eins og „Draumadís“, hvernig það rennur hnarreist áfram, lyft upp af yndislegum, gamaldags hljóðgervli; melódískum, Joy Division-legum bassa og ákveðinni en um leið blæbrigðaríkri söngrödd (Laufey hefur vaxið mikið sem söngkona). Platan einfaldlega virkar og er sannfærandi, og er það m.a. í takt við tónleikaframkomur sveitarinnar sem eru orðnar afskaplega flottar. Ég sá þær í Noregi í vor og þær voru frábærar. Stutt og öruggt prógramm, og sóttu þær í sig veðrið með hverju lagi. Íðiltöff á sviði, eitursvalar alveg. Það verður spennandi að fylgjast með sveitinni næstu misseri en Kælan Mikla er að verða þokkalegasta stærð í hinni alþjóðlegu skuggabylgjusenu og dómar, jákvæðir, eru farnir að birtast víða, í nafntoguðum neðanjarðarmiðlum.