Makrílveiðar ganga vel

29.06.2015 - 08:23
Mynd með færslu
 Mynd: Wikimedia Commons/Ramon FVelasqu
Makrílveiðar eru hafnar og töluvert er af makríl suður og suðvestur af landinu. Nokkur fjöldi skipa er nú við veiðar en óttast var að göngu makríls myndi seinka vegna kaldari sjávar í vor en undanfarin ár.

 

„Það hefur gengið þokkalega vel. Jafnvel betur en á sama tíma í fyrra,“ segir Guðmundur Ingi Guðmundsson stýrimaður á Huginn VE 55. Skipið er það næst kvótahæsta í ár á eftir Vilhemli Þorsteinssyni EA 11.

„Það þarf ekki að hafa mikið fyrir þessu. Þetta er nú bara annað halið hjá okkur í þessum túr. Stutt farið fyrir fínan afla. Menn eru að draga í tvo til fjóra tíma fyrir 150 til 200 tonn plús.“

Þó nokkur fjöldi skipa er nú við veiðar suðvestur af Reykjanesi. Auk Hugins má nefna Helgu Maríu, Brimnes, Heimey, Kap og Álsey. „Við erum núna í Skerjadýpinu. Komnir aðeins vestar en við vorum fyrir viku. Þá vorum við suður af Eyjum. Það er líka út af veðri sem við komum hingað,“ en Huginn er nú í sínum öðrum túr. Þegar hefur rúmum 400 tonnum verið landað.

Makrílkvóti hefur aldrei verið meiri en í ár eða um 173.000 tonn. Lítið af makríl fannst við landið í vor og var óttast að það gæti haft áhrif á makrílgöngu. „Var það ekki bara óþarfa svartsýni? Það þarf stundum aðeins að leita af þessu.“

Guðmundur segir ástand makrílsins gott. „Fiskurinn er bara þokkalega feitur og fínn. Stór, um 410 grömm, sem er bara þokkalega gott miðað við þennan árstíma.“

asgeirjo's picture
Ásgeir Jónsson
Fréttastofa RÚV
Síðast:
Þessi þáttur er í hlaðvarpi