Athugið þessi frétt er meira en 3 ára gömul.

Lögregla lokar og innsiglar The Viking

Mynd með færslu
 Mynd: Gunnlaugur Starri Gylfason - RÚV
Lögreglan lokaði verslunum The Viking seinnipartinn í gær. Samkvæmt upplýsingum frá lögreglunni á Akureyri barst beiðni frá Tollstjóra í gær um að loka versluninni og innsigla hana. Lögmaður hjá Tollstjóra segir fátítt að ráðist sé í svo viðamiklar aðgerðir. Eigandi verslananna vildi ekki tjá sig um málið við fréttastofu.

Klukkan 16.34 í gær fór lögreglan á Akureyri í verslun The Viking í göngugötunni, lokaði húsnæðinu og innsiglaði með lögregluborða. Verslunin er enn lokuð. Lögreglan segir beiðni hafa komið frá Tollstjóra um að ráðast í þessar aðgerðir. 

Fátítt að ráðist sé í svona aðgerðir

Jóhanna Lára Guðbrandsdóttir, deildarstjóri lögfræðideildar á innheimtusviði Tollstjóra, segist í samtali við fréttastofu ekki getað tjáð sig um einstök mál en almennt geti innheimtumaður ríkissjóðs farið fram á að atvinnurekstur verði stöðvaður ef viðkomandi skuldi ákveðna skatta. Þá eru vanskil á virðisaukaskatti og staðgreiðslu launagreiðenda algengust.

Spurð að því hvort það sé algengt að tollstjóri ráðist í svona aðgerðir segir hún svo ekki vera. Fyrst sé beitt vægari innheimtuaðgerðum, sé þess kostur.

Sagði lokað vegna vörutalningar

The Viking er líka með verslanir í Reykjavík, við Skólavörðustíg og Hafnarstræti. Þær eru einnig lokaðar. Þegar fréttastofa hringdi í verslunina á Skólavörðustíg í morgun sagði starfsmaður að það væri lokað vegna vörutalningar. 

Sigurður Guðmundsson, eigandi verslananna, vildi ekki tjá sig um málið þegar eftir því var leitað. 

Mynd með færslu
 Mynd: Gunnlaugur Starri Gylfason - RÚV
sunnav's picture
Sunna Valgerðardóttir
Fréttastofa RÚV