Athugið þessi frétt er meira en 11 mánaða gömul.

Loðfílatönn fannst við uppgröft á miðaldabæ

29.03.2020 - 06:46
Mynd með færslu
 Mynd: Bayerisches Landesamt für Denkm
Yfirvöld í Bæjaralandi greindu frá því á föstudagskvöld að fornleifafræðingar hafi óvænt grafið upp stærðar skögultönn úr loðfíl. Tönnin fannst við uppgröft skammt frá borginni Regensburg, þar sem fornleifafræðingar leituðu rústa bæjar frá 15. öld. Gertrud Rössner, yfirmaður spendýradeildar jarð- og steingervingafræðistofnunar Bæjaralands, sagði fundinn ótrúlegan. Tönnin sé einstaklega heilleg og algjör heppni að hún hafi fundist.

Loðfílar örkuðu um Bæjaraland þar til fyrir um 20 þúsund árum. Leifar þeirra finnast þó sjaldan í sambandsríkinu, hvað þá jafn heillegar og skögultönnin. Hún er um tveir og hálfur metri á lengd. Að sögn Deutsche Welle verður tönnin nú send til frekari rannsókna, en sérfræðingar telja hana hafa tilheyrt fullorðnum tarfi. Annað bein fannst nærri skögultönninni, en ekki er víst úr hvaða dýri það er. 

DW hefur eftir fornleifafræðingnum Christoph Steinmann að bæði beinið og skögultönnin hafi legið lengi ofan í vatni. Það skýri hvers vegna ytra byrði þeirra er enn heilt, þó þau séu byrjuð að morkna að innan. 

Við uppgröftinn fundust einnig leifar úr bænum sem leitað var að í upphafi. Til að mynda fannst brunnur, sorp-leifar, ofn og brot úr leirtaui frá miðöldum. 

Róbert Jóhannsson
Fréttastofa RÚV