Leyfi veitt til sprenginga vegna Fast 8

02.03.2016 - 20:43
Mynd með færslu
 Mynd: Björgvin Kolbeinsson - RÚV
Framleiðendur hasarmyndarinnar Fast 8 hafa fengið leyfi fyrir sprengingum á Langavatni við tökur myndarinnar. Fiskur gæti drepist en áhrifin eru tímabundin og staðbundin, segir Veiðimálastofnun. Undirbúningur fyrir tökur á Mývatni stendur sem hæst.

Fjölmennt lið er á Mývatni við undirbúning fyrir atriði í hasarmyndinni Fast 8 sem tekin verða upp á ísnum á næstunni. Snjór hefur verið ruddur af ísilögðu vatninu og í gær þeystu bílar um ísinn. Öryggisgæsla er á tökustað og óviðkomandi ekki hleypt að.

Alls kyns farartæki hafa verið flutt að Mývatni undanfarið, hraðskreiðir sportbílar, fólksbílar og trukkar auk vélsleða, sem settir hafa verið á flutningabíla og keyrðir á tökustað.

Mynd með færslu
 Mynd: Brynjólfur Þór Guðmundsson - RÚV
Lítið fer fyrir Langavatni sem er klakalagt og hulið snjó. Mynd: RÚV/Brynjólfur Þór Guðmundsson

Einn tökustaður er á snævilögðu Langavatni þar sem sprengjuhleðslur verða sprengdar. Til þess þurfti leyfi Fiskistofu og umsögn Veiðimálastofnunar. Í umsögninni segir að einhver fiskadauði geti orðið nærri sprengingunni en áhrifin séu tímabundin og staðbundin á litlu svæði.

Bæði bleikja og urriði eru í Langavatni en sprengingarnar eiga ekki að hafa alvarleg eða varanleg áhrif á fiskinn að mati Veiðimálastofnunar. Að auki telja sérfræðingar hennar ólíklegt að fiskum ofan og neðan vatnsins stafi hætta af sprengingunum.

 

Mynd með færslu
 Mynd: Brynjólfur Þór Guðmundsson - RÚV
Á vettvangi á Mývatni. Mynd: RÚV/Brynjólfur Þór Guðmundsson
Brynjólfur Þór Guðmundsson
Fréttastofa RÚV
Síðast:
Þessi þáttur er í hlaðvarpi