Athugið þessi frétt er meira en 3 ára gömul.

Leikstýrir spennuþáttum fyrir BBC

Mynd: Gunnar Hansson / RÚV

Leikstýrir spennuþáttum fyrir BBC

28.09.2019 - 15:00

Höfundar

Á þriðjudag verður sýndur á RÚV fyrsti þátturinn í sex þátta spennuþáttaröðunni Baptiste sem framleiddir eru fyrir BBC. Börkur Sigþórsson, sem meðal annars leikstýrði Ófærð, leikstýrir þremur af sex þáttunum. 

„Ég var bara 13 ára þegar ég var búinn að leggja undir mig myrkrakompuna í Valhúsaskóla. Ég held ég hafi eytt meiri tíma inni í henni en nokkurs staðar annars staðar,“ sagði Börkur Sigþórsson, leikstjóri og ljósmyndari í Mannlega þættinum. Börkur fékk ljósmyndabakteríuna ungur að árum og hefur síðan verið iðinn við að fanga umhverfið og sögur sem hann miðlar á myndrænan hátt. „Ég teiknaði rosalega mikið og málaði sem barn. Ég pantaði myndavél frá foreldrum mínum tíu ára til að taka myndir af fuglum og húsum og því sem tíu ára gutti hefur áhuga á, og málaði svo eftir því,“ rifjar Börkur upp. „Svo bara svissaði ég alfarið yfir, mér fannst ljósmyndunin áhugaverðari.“

Börkur tilheyrir síðustu kynslóðinni sem náði að eigin sögn í stélið á filmunni og þurfti því að framleiða myndir sínar í myrkrakompum. Hann var kominn langt inn á þrítugsaldurinn þegar hann fór að nota stafræna vél og segir hann að sú reynsla komi sér vel í kvikmyndagerð. 

Samfélagsmiðlar færu á hliðina ef þessar myndir væru opinberaðar

Þeir sem stunduðu hina goðsagnakenndu skemmtistaði Sirkús heitinn og Kaffibarinn á árum filmumyndavélarinnar vita að þar inni gekk ýmislegt án, nafntogað fólk skemmti sér á afar óheflaðan hátt og fólk stundaði staðina með regluna: „Það sem gerist inni á Sirkús fer ekki út fyrir veggi Sirkússins,“ að leiðarljósi að mestu. Þar var bannað að taka myndir og því geymast sögurnar af því sem þar fram fór að mestu leyti í munnmælum fram á daginn í dag. Börkur er þó einn þeirra fáu sem á mikið af myndum sem teknar voru á þessum skemmtistöðum á þeirra blómaskeiði. Það má leiða líkum að því að samfélagsmiðlar myndu loga ef þetta efni væri skannað inn.

„Á þessum tíma vann ég sem dyravörður á Sirkús og ég á fullt af myndum frá þessum tíma. Samfélagið var þannig að réttir aðilar fylgdu öðrum reglum og ég var þannig, var rétt tengdur.“

Leikstýrði Ingvari E. að dást að berum kroppum Mínusmanna

Þegar Börkur er að klára MH byrjar hann af alvöru að spá í kvikmyndagerð. Um tvítugt skaut hann bíómynd sem Björn Thors og Unnur Ösp leikstýrðu. „Ég hef áhuga á svo mörgu. Mér finnst líka gaman að skrifa og kvikmyndagerðin er allherjarform. Þar er pláss fyrir allt.“

Börkur hefur gert fjöldan allan af tónlistarmyndböndum og mörg þeirra hafa vakið mikla eftirtekt. Meðal annars hefur hann starfað með æskuvinum sínum í hljómsveitinni Mínus við gerð tónlistarmyndbanda fyrir þá. „Fyrsta leikstjórnarverkefnið sem ég geri er myndband fyrir lagið Romantic Exorcism með Mínus. Fljótlega í kjölfarið komast þeir á samning hjá Sony í Bretlandi og ég geri myndband við lagið Long Face. Þar má sjá Ingvar E. og Björn Thors og fleiri þar sem þeir eru að gleðjast yfir hálfberum meðlimum Mínus.“

Enginn bjóst við að þetta yrði svo mikill smellur

Fyrsta kvikmynd Barkar í fullri lengd er spennutryllirinn Vargur. Í kjölfarið fær hann sem fyrr segir tækifæri til að leikstýra Ófærð og síðar Baptiste sem einnig eru spennuþættir. Hann segir spennumyndaformið eiga ágætlega við sig en sem kvikmyndagerðamaður reiðir hann sig meira á myndmál en talmál.

En hvernig kemur svo gríðarstórt erlent tækifæri eins og Baptiste til hans? „Þetta eru samvirkandi þættir. Ég bjó í Bretlandi í tíu ár næstum og vann þar sem leikstjóri og gerði tónlistarmyndbönd.“ Samhliða þessu gerir Börkur nokkrar stuttmyndir og þá fer boltinn að rúlla fyrir alvöru. „Ég kom heim árið 2013 til að gera Varg, hóf þar samstarf með Baltasar Kormáki sem framleiðir myndina. Þannig kemur Ófærð til mín.“

Börkur segir að gífurleg velgengni Ófærðar hafi að mörgu leyti komið honum á óvart. „Enginn bjóst við að þetta yrði svona rosalegur smellur í Bretlandi til dæmis. Allt í einu er maður með eitthvað sem sýnir að maður geti tekið að sér ólík verkefni.“

Í kjölfarið byrjar hann að vinna að Baptiste og íslenskir áhorfendur fá tækifæri til að njóta afraksturs þeirrar vinnu næsta þriðjudag. Þættirnir eru hliðarsaga úr hinum geysivinsælu bresku sjónvarpsþáttum The Missing, þar sem persónan Baptiste var fyrst kynnt til sögunnar, en hann er lögreglumaður sem leitar uppi fólk sem hefur horfið og er sannkallaður spennutryllir eins og Börkur hefur sannað að hann kann að skapa.

Rætt var við Börk í Mannlega þættinum og má hlýða á allt viðtalið í spilaranum efst í fréttinni.

Tengdar fréttir

Sjónvarp

Ófærð einn af þáttum ársins

Menningarefni

Ófærð 2 fékk 335 milljónir úr ríkissjóði