Athugið þessi frétt er meira en 2 ára gömul.

Las upp dánarvottorð Oks

18.08.2019 - 14:58
Mynd: Hólmfríður Dagný Friðjónsd / RÚV
Fjölmennur hópur fólks sem gekk á Ok komst þangað upp um klukkan tvö í dag. Oddur Sigurðsson jarðfræðingur, sem hefur mælt stærð og þykkt Oks í gegnum tíðina, dró þar meðal annars upp óformlegt dánarvottorð Oks sem jökuls. Þetta er fyrsti jökullinn sem nýtur ekki lengur þeirrar skilgreiningar að vera jökull. Til að teljast jökull verður ísinn að vera 40 til 50 metra þykkur og hreyfast undan eigin þunga. Ísinn á Ok er aðeins um fimmtán metra þykkur.

Gönguferðin í dag er farin til að minnast jökulsins Oks. Bandarískir vísindamenn, Oddur jarðfræðingur, Katrín Jakobsdóttir forsætisráðherra og Andri Snær Magnason rithöfundar voru meðal þeirra rúmlega hundrað manns sem söfnuðust saman við Ok í hádeginu í dag. Þar tóku Katrín og Andri Snær til máls.

Fjölmennur hópur gekk af stað upp á fjallið til að afhjúpa minnisvarða sem þar hefur verið komið fyrir. Á honum stendur: „Ok er fyrsti nafnkunni jökullinn til að missa titil sinn. Á næstu 200 árum er talið að allir jöklar landsins fari sömu leið. Þetta minnismerki er til vitnis um að við vitum hvað er að gerast og hvað þarf að gera. Aðeins þú veist hvort við gerðum eitthvað.“ Sami texti er líka á ensku á minnisvarðanum.

Mynd með færslu
 Mynd: Hólmfríður Dagný Friðjónsd - RÚV

Guðmundur Ingi Guðbrandsson umhverfisráðherra og skipuleggjendur ferðarinnar og minnisvarðans fluttu stutt ávörp á fjallinu þegar minnismerkið var afhjúpað. 

Mynd með færslu
 Mynd: Hólmfríður Dagný Friðjónsd - RÚV