Mynd: RÚV
Athugið þessi frétt er meira en mánaðargömul.
Kosningar háðar framgangi þingstarfa
Forystumenn ríkisstjórnarinnar segja að til greina komi að þingkosningar verði í seinni hluta október. Það sé þó háð ákveðnum fyrirvörum. Sigurður Ingi Jóhannsson, forsætisráðherra og varaformaður Framsóknarflokksins, og Bjarni Benediktsson, fjármálaráðherra og formaður Sjálfstæðisflokksins, funduðu í dag með forystumönnum stjórnarandstöðunnar.
Eftir fundinn sagði Bjarni að búið væri að grisja nokkuð úr þingmálaskrá ríkisstjórnarinnar. Áhersla verði lögð á tiltekin mál. Hann tiltók þó ekki nákvæmlega hvaða mál séu í forgangi. Mörg mál séu komin fram frá öllum ráðuneytum, sem gert er ráð fyrir að klárist á þessu þingi. Aðspurður um hvenær þingkosningar verði, sagði Bjarni
Með öllum fyrirvörum um eðlilegan framgang þingstarfanna, þá vorum við að ræða um það að síðari hluti október gæti verið ágætlega ákjósanlegur tími.
Sigurður Ingi sagði eftir fundinn að óskað hafi verið eftir að starfsáætlun þingsins yrði breytt, í samræmi við nýja þingmálaskrá ríkisstjórnarinnar.
Um dagsetningu kosninga sagði Sigurður Ingi:
Starfsáætlunin miðast við það að við getum lokið þessari þingmálaskrá með eðlilegum hætti núna fyrri part sumars og seinni part sumars og fram á haust, og þá væri hægt að sjá fyrir sér kosningar seinni partinn í október.
