Athugið þessi frétt er meira en 4 ára gömul.

Kemur kannski aftur eins og vínyllinn

05.02.2018 - 07:30

Mynd: Gunnlaugur Starri Gylfason / RÚV/Landinn

Vídjóleigur eru orðnar sjaldgæf sjón á Íslandi og heyra nánast sögunni til, Videoval á Siglufirði er ein fárra sem enn er starfandi. Mæðgurnar Sigrún Björnsdóttir og Svala Júlía Ólafsdóttir sem reka leiguna segja þetta sorglega og öfuga þróun og vísa í stemninguna sem fylgir því að fara á leiguna, stemningu sem ekki er hægt að upplifa með því að hala myndinni niður af netinu eða sækja hana í gegnum myndlykilinn.

Það er bara rúmlega ár síðan þær mæðgur hættu að panta inn myndir, þegar það stóð ekki lengur undir kostnaði. Í dag halda þær rekstrinum gangandi með því að selja allt frá dýrafóðri til leikfanga en mesta aðdráttaraflið hefur nammibarinn sem er sá eini í bænum. Þrátt fyrir að þær séu hættar að kaupa inn myndir er fólk enn að leigja þær myndir sem til eru á lager.

,,Það er alltaf einn og einn sem kemur og tekur, eins og sjómenn sem lenda hérna inni í brælu og komast ekki á sjó, þeir koma og taka myndir til að stytta sér stundirnar," segir Svala og bætir því við að fjölskyldufólk sem er í bústað við Siglufjörð á sumrin sé duglegt að koma líka.