Athugið þessi frétt er meira en 3 ára gömul.

Íslenskir tónlistarmenn í Sierra Leone

Mynd:  / 

Íslenskir tónlistarmenn í Sierra Leone

22.11.2018 - 16:30

Höfundar

Hópur íslenskra tónlistarmanna lagði á dögunum land undir fót til Sierra Leone og tók þar þátt í vikulangri vinnusmiðju með þarlendum og breskum tónlistarmönnum. Vinnusmiðjan var haldin á vegum Aurora-velgjörðarsjóðs, en tónlistarmennirnir notuðu tækifærið til að semja og taka upp nýja tónlist í sameiningu.

„Þetta er búið að vera magnað ferli. Fyrsta sinn sem ég kem til Afríku og það var magn- og tilfinningaþrungið. Ég er ættaður frá Angóla sem er neðar í álfunni. En ég er búinn að bíða eftir því mjög lengi að fá tækifæri til að koma,“ segir Logi Pedro Stefánsson, einn íslensku tónlistarmannanna sem heimsótti Sierra Leone. 

„Ég tek með mér hvað tónlistin er sterk, hún hefur fært mig hingað og gefið mér færi á að kynnast þessu fólki. Að fá að heyra sögur frá krökkum sem fengu kannski ekki að fara í skóla en geta sungið. Hvað tónlistin getur fært manni mikla gleði og mikið líf, ég tek það með mér. “ 

Undir það tekur Hildur Stefánsdóttir. „Þetta er búið að vera mjög skemmtileg upplifun. Ég er búin að kynnast mörgu fólki með allt annan bakgrunn en ég hef. Og það að vera tónlistarmaður eða kona hér í Sierra Leone er ótrúlega öðruvísi veruleiki. Það er gott stundum þegar manni finnst erfitt að vera tónlistarmaður á Íslandi að minna sig á að það getur verið miklu erfiðara á öðrum stöðum, til dæmis hér.“ 

Mynd með færslu
 Mynd:

Ragna Kjartansdóttir, sem rappað hefur undir nafninu Cell7, segir ferðina hafa verið mjög áhrifamikla. 

„Ég hef aldrei áður farið í svona vinnusmiðju og skrifað með öðrum. Með öllu þessu fólki, úr ólíkum heimsálfum, að koma saman og gera eitthvað sem við höfum öll áhuga á og tónlist sem við öll fílum, það var merkilegt fyrir mig. Ég hef haft mjög þröngan tónlistarsmekk hingað til. En ég sé að tónlistin sem við höfum verið að gera hér er bara svolítið æðisleg. Jafnvel þótt hún sé ólík þeirri tónlist sem ég hlusta á þá er hún samt í sjálfri sér frábær. Sköpunin er svo mikil og sköpunarkrafturinn. Fólkið veitir manni svo mikinn innblástur því gleðin er svo mikil í sköpuninni.“

Fjallað var um ferðina í Menningunni. Horfa má á innslagið hér að ofan.