Athugið þessi frétt er meira en 3 ára gömul.

Íbúðaverð hækkar, mikið framboð og mikil óvissa

Mynd með færslu
 Mynd: Vilhjálmur Þór Guðmundsson - RÚV
Íbúðaverð á höfuðborgarsvæðinu hækkaði um 0,5% á milli mánaða í febrúar. Þetta kemur fram í Hagsjá Landsbankans. Þar segir ennfremur að vísbendingar séu um að framboð nýrra íbúða sé meira nú en nokkru sinni fyrr. Mikil óvissa sé þó á íbúðamarkaði vegna þeirrar stöðu sem upp er komin.

Í Hagsjánni segir að hækkunin í febrúar sé áþekk hækkuninni sem mældist milli mánaða í janúar. Verð á fjölbýli hækkaði um 0,5% og verð á sérbýli um 0,7%. 

Þá segir að íbúðafjárfesting hafi aukist um 31% milli ára samkvæmt nýlega birtum þjóðhagsreikningum Hagstofu Íslands, sem sé mun meiri vöxtur en sést hafi á síðustu árum. 

„Þetta er vísbending um það að framboð nýbygginga sé talsvert og raunar ekki verið meira í áraraðir. Í þessu samhengi er þó vert að nefna að nýbyggingar voru einungis 17% af öllum seldum íbúðum í fjölbýli í fyrra á höfuðborgarsvæðinu og var hlutfallið óbreytt frá fyrra ári, þrátt fyrir umtalsverða aukningu í nýjum íbúðum á markaði,“ segir í Hagsjánni.

Óvissa vegna COVID-19

Mikilvægt sé þó að hafa í huga að gögn um framboð íbúðarhúsnæðis virðist vera misvísandi. Samkvæmt upplýsingum um veltu í byggingariðnaði út frá virðisaukaskattsskýrslum megi sjá mun hægari vöxt í greininni, sem sé á skjön við gögn um íbúðafjárfestingu.

„Það er óhætt að segja að mikil óvissa ríkir um stöðu íbúðamarkaðar um þessar mundir. Misvísandi gögn vekja upp spurningar. Mikið virðist vera byggt án þess að sala aukist. Er verulegt magn af nýjum íbúðum að streyma inn á markaðinn sem seljast illa, eða er um tímatöf í gögnum að ræða? Á meðan upplýsingar um framboð íbúðarhúsnæðis eru óljósar verður erfitt að meta stöðuna með óyggjandi hætti.“

Samkvæmt Hagsjánni ríkir ekki bara óvissa um framboðið, heldur einnig um eftirspurnina. Sú óvissa hafi aukist í kjölfar útbreiðslu COVID-19 faraldursins. Fólk muni hugsanlega fresta því að fara á opið hús eða skoða eignir innan um margt fólk. Það gæti orðið til þess að fækka viðskiptum með íbúðarhúsnæði um stundarsakir. Sveiflur í fjölda viðskipta hafi hins vegar haft lítil áhrif á verðmyndun í fyrra.

„Stærð eða umfang áhrifanna af þeim aðstæðum sem nú eru uppi í þjóðfélaginu eru mjög óljós á þessari stundu, en húsnæðismarkaður gæti orðið fyrir áhrifum líkt og aðrir markaðir,“ segir í Hagsjánni.