Athugið þessi frétt er meira en mánaðargömul.

Hvetur Play til að birta kjarasamninga

22.11.2019 - 10:16
Mynd með færslu
Drífa Snædal, forseti ASÍ. Mynd: Aðsend mynd
Drífa Snædal, forseti ASÍ, hvetur nýja flugfélagið Play til að birta kjarasamninga og leggja allt á borðið. Ekki verði liðið að fyrirtæki starfi á íslenskum vinnumarkaði með undirboðum.

„Það þótti tíðindum sæta að nýtt flugfélag var stofnað hér á landi og fréttir berast af því að kostnaði verði haldið í lágmarki með öllum ráðum, m.a. með því að halda launum niðri. Fyrirtækið hefur ekki birt kjarasamning sem það þykist hafa gert um störf flugliða og fær fólk sem sækir um störf varla að vita kaup og kjör,“ segir Drífa í föstudagspistli sínum.

ASÍ hafi borist vísbendingar um að greiða eigi grunnlaun langt undir því sem almennir kjarasamningar segi til um. Hún hvetur fyrirtækið því til að birta samninginn.  „Ekki aðeins á fólk sem hyggst sækja um störf hjá Play rétt á þessari vitneskju heldur skiptir það okkur öll mái ef verið er að stunda undirboð á vinnumarkaði.“

Hún ætlast einnig til þess að fjárfestar og þeir sem eiga í viðskiptum við fyrirtækið krefji það um þessar upplýsingar. Ekki verðið liðið að fyrirtæki starfi á íslenskum vinnumarkaði með undirboðum.